I Johana 3:2
“Amah a lo lan hun chuan amah ang kan la ni ang tih zawng kan hria, a nih ang takin amah chu kan la hmu dâwn si a.”
Van nun ropui tem lawkna nei hiala sawi leh amah ngei pawhina Isua zara changa inhria Fanny Crosby hian Pathian fak leh chawimawin hla ropui leh tha tak tak sangriat chuang a phuah niin an sawi a. Rimawi siamchhuaktute nena inremna leh thawh hona an neih hnua a puitlin chhoh meuh kha chuan kar khat chhungin hla puitling pathum bawr vel a phuah thin niin an sawi.
A mit a del avangin a hriatna leh Pathian pawlna a neih tlem phah lo va, a hla phuahna kawngah Pathian pawlna nasa tak a chan phah zawka chu chuan heng a hla siamchhuahte hi a tinung zawk em em bawk a ni. Mak deuh mai chu a rilru-ah hian hla a awmsa veka, chu chu a sawichhuak a, a thiante emaw a thawhpuiten a thluk nen an lo siam mai thin a ni.
‘Blessed Assurance’ tih hla KHB No. 415 ‘Hriatchianna hlu ber’ thluk hi kum 1873 khan Metropolitan Life Insurance Company hmuchhuaktu nupui, Phoebe Palmer Knapp-i siam a ni a. Chumi kum chuan Phoebe hian Brooklyn-ah Fanny Crosby chu a va pan nal nal a, hla thluk a siamthu a hrilh a. Fanny chuan, “Anih han play la” a ti a. Phoebe chuan uluk takin a han play rat rat a, “A thluk chu eng nge ang i tih?” tia a han hawi let chuan Fanny Crosby chu thingthiin a lo tawngtai reng tawh mai a.
Engmah sawi lo chuan Phoebe chuan a han play chhunzawm ve zel a, vawi hnihna leh vawi thumna a han play zawh chuan Fanny Crosby chuan, “Chu chuan tihian a sawi, ‘Hriat chianna hlu ber, Isua ka ta, Van nun ropui tem lawkna hlu tak chu'” tiin.
Tichuan he lawmna leh thlamuanna hla duhawm tak, chung van miten min rawn thlen ve chu chang vein min hruaikhawm hun tur thlir lawkna min neih theih tirtu chu kan lo nei ta a ni.
‘Hriatchianna hlu ber, Isua ka ta, Van nun ropui tem lawkna hlu tak chu; Pathianin min lei, chhandam kan ni, Thlarauva piang thisen sil fai chu’.