Hebrai 4:12
“Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.”
Evangelist ropui tak, John Wesley (1703-1791) kha vawikhat chu a inkhawm bang haw hi rukruten an lo tibuai a, an man bet a. A neih zawng zawng laksak tumin an bei a.
Wesley chuan pawisa tam tak a nei lem lo a, a pawisa neih chhun chhun leh kristian lehkhabu tlem azawng a ah chu an laksa ta ringawt mai a ni.
Neih a neih loh avang chuan kalsan mai an tum a, mahse Wesley-a chuan an kal liam hmain a ko a, engemaw pêk tur a neih thu a hrilh a. Rûkrute chuan mak an ti êm êm a, beisei nei deuh chung chuan an va pan leh a.
Wesley-a chuan, “Ṭhiante u, tuna in awm dan hi pawi inla ti viau ang. In thil tihsualah inchhir hun in rawn nei anih chuan hei hi hre reng ang che u. Kan sualna zawng zawngte Isua krista thisenin a tlengfai tawh, tih hi” a ti a. Chu thu mai a hrilh avang chuan misualte chu an tlanbo ta vek a.
Kum a liam hnu chuan chawlhni inkhawm banah Wesley-a chu a ṭhiante nen an inchibai liam liam a, chutih lai chuan mi danglam tak hian a rawn chibai ve bawk a. A insawi hnu chuan hmana a inkhawm bang rawktute zinga mi kha a lo ni reng mai a. Pathian thiltihtheihna a chungah a lang a, a lo piangthar a, sumdawng hlawhtling tak a lo ni ta a ni.
Kan awm ang anga min hmangaihtu a awm. A hnen chu pan ila, a khawngaihna kutin min lo chelh dawn si a.