MATHAIA 7:9
‘A nih leh, nangniho zînga tu pawh hi, a fapain chhang dîl sela, tu nge lung pe ang?’
Pathianin mi chi hrang hrangah min siam a, ngaihdan leh rilru hrang hrang neiin min siam bawk a, kan duh dan leh kan duh loh dan pawh a inang lo hlawm hle a ni.
Vawikhat chu naupang pakhat hi an venga Kohhran upa hnenah chuan a rilru buaina a thlen a, an upa hnenah chuan, “Ka pu, hmanni-ah mi tam tak an ṭawngṭai ka hmu a, thil chi hrang hrang Pathian hnenah an dil a, Pathian tan chuan a va luhai thlâk dawn em em ve” a ti a.
Upa chuan, “Engtin nge an ṭawngṭai a?” tiin a chhang a. Naupang Chuan, “Mipakhat chuan boruak nuam leh ṭha tak a awm theihna turin a ṭawngṭai a. Theitui vawt zuar ve thung erawh chuan a thil zawrh a hralh theih nan khaw lum tak a dil a, lo neitupa chuan a thlai an ṭhatna turin ruah a dil bawk si a. An vai chuan mi fel tak tak an ni a. Pathianin a chhang vek awm si a. Engtin nge Pathianin a chhan tak ang le?” a ti a.
Upa chu a nuih a za khawp mai a. Naupang hnenah chuan, “Tunah boruak hi engtin nge a awm?” tiin a zawt a. “Boruak nuam leh tha tak a ni” tiin a chhang a. A nih leh kar hmasa khan a ti a. Naupang Chuan, “Kan ngaihtuah lêt ang e, Thawhṭanni leh thawhlehni khan ruah a sur a; Ningani khan khua a vawt a, inrinni khan khua a lum hle a ni” a ti a.
Upa chuan, “Ni e, mama Pathian hian kan ṭawngṭaina zawng zawng hi a ngaithla a, kan dilna te hi tlawm hle mah se thinlung leh tihtakzeta kan ṭawngṭai chuan min chhang vek ṭhin a lawm” a ti a.
‘Engkim, ring chunga ṭawngṭaia in dîl apiang in hmu ang,” a ti a.’ – MATHAIA 21:22