THUFINGTE 22:6
‘Naupang chu awm dân ṭha zirtîr la, A upat hnuah pawh a thlah lo vang.’
Fa enkawl kawngah harsatna tawk lo nu leh pa an tlem viau awm e. Fa enkawl chauh lohah pawh, kawng hrang hranga inenkawlna kawngah, mahni leh midangte enkawlna kawngah pawh a ni ang. Kawng dik leh ṭha inzirtir hi a har hle. A chhan chu enkawltu leh zirtirtute an famkim loh vangte pawh a ni thei ang. Engpawh nise midangte finchhuah tur te, zirtir tur te leh enkawl tur hian kan famkim hun chauh kan nghah dawn chuan engtikah mah chu chu a thleng ngai lo ang.
Vawikhat chu tlangval pakhat hi roreltu (judge) hma-ah a rawn inlan a. A thil tihsual avanga khaihlum theihna thupêk a dawn vang a ni. Roreltu chuan chu tlangval chu a lo hre khawp mai a. Tlangval hnenah chuan, “Tlangval, i pa kha ka ṭhianṭha tak a ni asin. Nang chuan i zah lo em em ṭhin a, a thu i awih loh avangin tun dinhmun hi i thleng ta a ni tih i in hria em?” a ti a.
Tlangval chuan, “Aw hria a, ka pa kha ka hrechiang khawp mai” tiin a chhang a.
Tlangval chuan sawi chhunzawmin, “Ka pa hnenah chuan ka harsatnate leh ṭanpui ka ngaihna ka thlen ṭhin a. Chutianga a bula awma inkawm tuma ka pan apiangin ka pa chuan, ‘Ka buai em mai, hun ka nei lo’ tiin min chhang ṭhin a. Ka pa chuan lehkhabu ṭha tak tak leh dan lampang a thiam em em a. Mahse kei erawh tun hi ka thleng ta anih hi” a ti a.
He khawvelah hian kan mihringpuite, kan chhungkaw member-te aia pawimawh engnge awm ang le. Thildang zawng zawng aiin kan hmangaih zawk tur a ni.
Nu leh paten fate tana an thilpêk theih ropui ber chu Isua Krista nun entir hi a ni.