FILIPI 3:17
‘Unaute u, ka awm dân hi zir zêl rawh u. Entawn tûr keini min nei a, kan awm dân anga awmte chu en berah neih rawh u.’
Film chang thiam hmingthanga mite sawi Charles Cobourn-a khân hetiang hian a chanchin a sawi; “Naupang mai ka nih laiin movie en hi ka ching hle a, ka tuina a ni a, nuam ka tiin ka hunawl neih apiang chu movie en nan ka hmang ṭhin. Kan khua-a film chhuahna hmun chu ka hre vek a, ka kal kual ṭhin.
Vawikhat chu ka pa hian tihian min zilh a, ‘Thil pakhat ka hrilh ang che, movie en i ching em em tih ka hria a, fimkhur ngaihna leh ti lo tura ka duh che chu miten khawilaiah emaw hmeichhe ruak lanna te, film dukdaklo an lo chhuah chuan chutah chuan kal ve reng reng lo la, en pawh en tum reng reng lo ang che, i kala i en chuan i hmuh tur ni miah lo naupangin i hmu ang’ a ti a.
Kei chuan, ‘Ni e ka pa, chungah te chuan ka kal ngai hlei nem, indo chhuahna te, nuihzatthlak chhuahna film chiah ka en ṭhin alawm’ ka ti a. Nikhat chu pawisa ka nei nual a, ka pa sawi film an chhuahnaah chuan kal ka chak ta em em mai a, ka kal ta ngei a, ka pa chuan a lo sawi dik khawp mai. Ka hmuh tur ni lo chutah chuan ka hmu a, ka pa chu a lo awm reng a, kan inhmu ta hlawl mai a ni” a ti a. A zia lo hle a ni.
Tute pawh hi nu leh pa kan la ni vek thei a. Kan ni lo anih pawhin tute tan emaw chuan Kohhranah emaw khawtlangah entawn tura kan awm a ngaihna leh ṭulna a awm ṭhin. Charles Cobourn-a pa anga Pa entawntlak lo, fate hnena thil ṭha hrilh a mahni’na zawm leh si loh hi a pawi em em a ni.
Paula khan mi zirtu ni rawh u a ti a. Keini pawh miten keimahniah Lal Isua nun an lo zirchhawn theih nan leh a hmelmawi tak hmuh tirtu kan nih theihna turin kan nun hi uluk takin kan hmang ṭheuh tur a ni.
Keiin Krista ka entawn ang hian nangni pawhin mi entawn ve rawh u. – 1 KORINTH 11:1