GALATIA 5:22-23
Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te, nunnêmna te, insûm theihna te a ni. Chutiang kalh zâwng Dân a awm lo ve.
Tute pawhin hlim taka awm kan duh a, mahse tute pawh hian hlim taka awm har kan ti ṭheuh lawi si a. Hlimna kan duh a, kan zawng a, mahse chu chu mitlemte chauhin an nei.
Sikh-pa pakhat pawh hian hlimna a zawng a. Khawchhak ram mifing hnenah chuan a han kal vang vang a, thu pawimawh em em, hlimna neih theih dan leh a thlahte thlahte leh zel hnenah pawh a hnutchhiah tur a hrilh ta a.
Khawchhak rama mifing chuan, “Pa ber a thi a, a fapa a thi a, a tupa a thi leh ṭhin” tih thu a hrilh a. Sikh-pa, pa hausa tak mai tan chuan chu thu chu a ho hle ni tur a ni, a thin a rim em em a, “Chu chu hlimna, chhungkaw inthlahchhawng zel turin kan inchhawm tur chu maw!” a ti a.
Mifing chuan, “I tupa kha nang aiin thi hmasa se, i fapa kha nang aiin thi hmasa bawk se, i thinlung chu den sawm angin a keh chhe vek ang. Nun hian awmzia reng nei loin i inhre bawk ang. In chhungkua chu a upa pa aṭangin inthihsan ṭhin zel ula, chung chuan lungngaihna ata min tidam ṭhin” a ti a.
Philospher-te chuan, “Hlimna chu mite an hlim a ni tih hriattir hi a ni lo a. Lungngaihna leh ṭahni a tawn chiahin a tawn loh lai kha a hlimlai a ni tih hriatchhuah tir hi a ni” an ti.
Ringtute hlimna hi eng nge? Hlimna kan tih hi engti’angin nge kan hriatthiam. Harsatna tâwk miah lova chhungkuaa awm te, kan duh leh mamawh apiang neih te hi em ni hlimna ni ang! Chu chuan min tihlim teh reng ang le! Mahse Khawvêl nawm hlimna ni lo thlarau rah hlimna kan neih si loh chuan chung anga harsatna tâwk lo nih ringawt chu a tawk lo a ni.
Hrehawm nasa taka fiah an ni chungin an lâwm ta êm êm a, an pachhe hle chung pawhin an thilphal êm êm a ni. – 2 KORINTH 8:2