MATHAIA 11:29
‘Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang.’
Janie Jolt-i chu kristian nula pangngai tak a ni a. Ram hla takah lehkha zirin College a kal a. Amah chauhva a awm avangin inchhûng chêt leh khawsak velah a buai em em lo a. Lehkha zir chu a hna pui ber a ni. Alarm awm Sana ṭha tak mai hi a nuin a present a, chu chu a hmang ṭangkai em em ṭhin a. Nula kawhmawh bâwl lo, nunphung pangngai taka nung, kristian ṭha taka sawi theih ni chiah lo mah se kristian nun pangngai pawl pha ve tho hi a ni a.
Harsatna erawh a nei a, sual rawngbawlin a hun te nawmchennan hmang lo mah se a nun hi a hlim hran lem lo va, khawharna, mal ngawih ngawiha inhriatna a nei ṭhin a, thil a ngaihtuah vak vak a, zan pawh a mu ṭha ngai meuh lo a ni.
Vawikhat chu a muthilh vanglai takin a nu alarm pêk chu dar 5:30-ah a rawn ri ral ral mai a. Chutiang hunah alarm a set ngai si lo a, mak a ti em em a, zan a mut ṭhat loh avangin a tho peih lo hle a, mahse alarm a rik reng avang chuan a va off a, mut an tum leh chu a muhil thei ta reng reng lo mai a. A tho leh ṭhin a, a khum kotlangah ṭhuin a dawhkan sira Bible chu a melh ran mai a, vawi tam tak a keu tawh loh anih avangin a paw thak mai a. Bible chu a la a, a hrufai a, a han keu a, chhiar pawh tum em em lo chu a chhiar ta a, a chhiar tui zêl a, dawhkanah uluk takin a zir ta a.
Tukverh aṭanga zing ni chhuak eng mawi tak chuan a rawn chhun a, zing boruak nuam tak hnuaiah a bible chhiar chuan a nun a khawih a. Chumi tûk aṭang chuan zingah hma takah thovin Bible a chhiar a, a ṭawngṭai a, Pathian a pawl ṭhin a, a nun pawh a rawn hlim chho ta a, a khawhar châng apiangin Bible a zir zawm ta ṭhin a ni.
Nitina Bible chhiar leh ṭawngṭai chuan a nun a tidanglama, a thlah phal tawh ngai lo a ni.
Nitina Bible chhiar leh ṭawngṭai ṭhin chu a nunah hmuh theih leh hriat theihin Krista hmel a lang ṭhin.