1 KORINTH 4:4
‘eng mah indemna tûr ka hre si lo, sawisêlbo ka ni tihna zawng a ni lêm lo, mi fiahtu chu Lalpa a ni zâwk.’
‘Focus on the Family’ tih lehkhabu ziaktu, Rolf Zettersten chuan a ṭhianpa, Edwin-a chanchin tihian a ziak.
A ṭhianpa, Edwin-a chuan car thar a lei a, a car thar chu a changkang em em a, a petrol awm leh awm loh thu te, a air condition tui a zawh leh zawh loh tur thute hrilh theitu, hmeichhe ṭawng in record sa vek a awm a. Vawikhat pawh a office kal dawnin a seat belt a hren loh avangin a car-a hmeichhe ṭawngthei an dah chuan a rawn hrilh a ni.
Nikhat chu hmun hla takah a zin a. Thui tak a tlan hnu chuan hmeichhe ṭawngthei chuan petrol a mamawh thu a rawn hrilh lauh lauh mai a. Edwin-a chuan, “Ngawi lawk rawh, kan thun thuai dawn nia, ka la tlan laklawh em mai” tiin a chhang ve mai a.
Nakin hnuah chuan hmeichhe ṭawngthei chuan Edwin-a chu rawn hriattir lehin “I petrol a zo ṭep e” a rawn ti leh a. Edwin-a chuan, “Aw le, ka lawm e, ka hria alawm, mahse hei kan thleng ṭep tawh a, min daih thei mai ang” tiin a chhang a. Chutia a chhan zawh chiah rual chuan, “I petrol a zo ta e” a rawn ti a. Edwin-a thinin a tuar ta lo a, “Nang hmeichhia te te, i va bengchheng ve” ti chung chuan a record-na hrui chu a ti chat ta hmiah mai a. A reh chiang hle!
A hnu lawkah chuan kawng sirah ṭhu sawp nuaiin Edwin-a chu a indawm kun tlawk tlawk a, “Aw, petrol chu lo thun ve mai ila chu ka thleng tawh tur a nia.” a ti a ni.
Aw le, Pathianin kan ṭhatna turin hlauhawm lo thleng tur te min hrilh lawk ṭhin a, khawvel thil tak pawhin vauna leh zilhna pawh kan tawng ṭhin a ni. Kan chhia leh ṭha hriatna chuan ṭha leh ṭha lo a hria a, chutah chuan thutlukna pawimawh tak kan siam tur a ni.