ISAIA 55:9
‘Vân khi lei aia sâng a ni ang khian, Ka awm dân hi in awm dân aia sâng a ni. Ka rilru pawh in rilru aia thûk a ni.’
Artui siam dan lehkhabu chhiar chungin chu artui chu bowl chhungah tihkeh kan tum tawh em! A siam dan i thiam viau te a nih loh a, a siam dan ziak chhiar chunga en lova i tihkeh chuan bowl-ah ni lovin dawhkanah te, chhuatah te a baw nuai mai ang. Ei siam thiamte reng rengin engpawh siam dawn ila, a siam dan ngun takin zir phawt a, chumi hnu-a uluk taka siam ṭhin tur a ni an ti.
Artui siam thiam lo kan awm lem lo ang, mahse tehkhinna atan kan han hmang mai a. Bible pawhin artui siam dan min hrilh kher lo, amaherawhchu kan sawi tum nena phuah rem tak a nih avangin kan han hmang mai a ni e.
Israel faten ramtiam Kanan an thlen dawnin awmhmun an khuar a, Kanan enthla turin Mosia chuan Pathian hriattir angin hnam sawmpahnih zinga thlahtute zinga Puipa ṭhiau a tir a. An zinga sawm te chuan an ram en chu a ṭha lo lamin an rawn sawi ta si a. Israel thlahte zawng zawng chu Mosia leh Arona chungah an phunnawi leh ta a nih kha. Engtin nge an tih, “Aigupa ramah khan Pathianin min tihlum ṭhen sela aw” an ti a nih kha.
Enthla tura kal, Pathian ram pek tur Kanan ram chanchin a ṭha lo zawnga rawn sawi a, harsatna thleng tur leh a hrehawm dan turte rawn sawitute chu Lalpa hmaah hriin an thi a. Pahnihte erawh chu a ṭha zawnga an sawi avangin an thi ve ta lo a ni.
Aw le, mihringte hian Pathian lam kan thlir lo-a keimahni lam ngaihdan leh duhdan ringawt kan thlir a, chuta kan rilru leh ngaihtuahnate kan nghah chuan Pathian hremna kan tawk ve ang. Pathianin a theih tawh loh kan tihna hmun aṭangin thil min thlir pui ve lo.
Kan nunin rahchhuah duhawm tak a neih a, a ṭha thei ang bera kan nun a inherchhuah theihna tura min hruai theihna turin kan thinlungte chu amahah kan nghat hmasa fo tur a ni.