1 Petera 3:4
‘Thinlunga mihring thuhrûk chu, rilru thuhnuairawlh leh nunnêm, silhfên chhe thei lova inthuam ni zâwk rawh se, chu chu Pathian mit hmuhin a hlu êm êm a ni.’
Han ngaihtuah teh le! In khawpui chu chhiatrupna engemaw ber, lirnghing emaw, leimin emaw, kangmei emaw tuilianin emaw nuai thut ta se la, thil engkim mai chu chhe vek ta se. Sawrkar pawhin a siamṭhatna turin kum 10 a ngai ti ta mai se, engtin nge in nun ang?
Kum 1993 khan tuilian avangin Valmeyer, Illinois-ah chu chu a thleng tlat a ni. Mitinte chuan an neih zawng zawng an chân a, neih an nei ta lo a nih kha. Tichuan an tum ber chu ṭangruala a rang thei ang bera an khawpui siamṭhat leh chu a ni.
Chu hna hautak tak thawk tur chuan mitinte chuan an nunphung an tidanglam a, an han thawh takah chuan hun reilote chhûngin hna tam tak an thawk hman a, tui a len aṭanga kum 3 chhungin US Dollar maktaduai 22 man thil an tungding hman hial a ni.
Helen Keller chuan, “Nitina kan tih tur aia tam hret hi tih kan tum tur a ni” a ti. Chu thu chu Valmeyer mipuite thinlunga awm, an khawpui an tundin lehna tura an innghahna a ni thei ang.
Aw le, kan nun hlutna hi i ngaihtuah ang u. Tihchhiat a ni tawh em, tihhliam a ni tawh em, dam thei tawh lo tura tihnat a ni tawh em le!
Kan nunna hi a hlu em em a ni tih hriain tisa leh thlarau kawnga kan enkawlna kawngah hian tun aiin i ṭang lehzual ang u. Kan damchhung hun tawite-ah hian i tungding ang u.
Khawvel khawpui mah tungding tura kan ṭang anih chuan khawpui chhe thei lo chang turin kan nun kan tungding tur a ni.