MATHAIA 19:21
Isuan, “Ṭhat famkim i duh chuan, kal la, i thil neihte hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a.
Chanchinbu mi leh khawpuia mi pawimawhte chu kum 1953 khan Rêl chawlhhmunah tlai khat chu an rawn kal khâwm hlawm a. An mi hmuh tum leh hmuah chu kum 1952-a Nobel Peace Prize dawngtu, Dr. Albert Schweitzer a ni.
Rêl a rawn thlen chuan mi tam tak an phe suau suau a, an innêk nuai nuai a, chutih lai tak chuan pa lian tak, fit ruk leh inches 4 laia sâng, sam buk chhem chhum leh hmuihmul nei chhep chhup chu rêl aṭangin a rawn pên chhuak a. Camera an lo hmet de chiai chuaia, a ṭhenin chibai tumin an kut an rawn phar suau suau bawk a. Miṭhenkhatin kawm tumin an rawn innêk phei a, an ngaihsân zia hrilh tum mi tam tak nên an ri nuai nuai mai a ni.
Dr. Albert-a chuan lawmthu hrilh hlawm mawlh mawlh pah chuan, “Min lo hrethiam lawk teh u” a ti a. Mipui karah chuan a inzep phei a, a piah lawka pitar pakhat, suitcase pahnih rit tak khai chu panin a va ṭanpui a, bus-a chuang tur anih avângin bus dinna thleng chuan a hruai ta a, tluang taka zin tura duhsakna a hlan hnu chuan a rawn lêt leh a. Mipui hnenah chuan, “Ka innghahtir che u avângin in ngaihdamna ka dil e” a ti a.
Africa rama Daktawr lâr tak, mirethei leh ṭanpui ngaite ṭanpuitu, Missionary Daktawr, Dr. Albert Schweitzer chu mite entawntlâk nun nei a ni. Khawvêl ropuina um ai chuan chanhai leh riangvaite ṭanpui chu tih tur hmasa berah neiin mit ngeia a lo hmutu pakhat chuan, “Sermon kal thei ka vawikhat hmuhna a ni” a ti.
Keini pawh tun aia nasa zâwkin ṭan han la leh ila, kan nunah Isua Krista hmêl mâwi tak miten an hmuh theihna turin kan chezia chu Isua Krista-ah tihfelin lo awm zêl rawh se. Chu chu sermon ropui ber a ni.
SAM 72:13 – Retheite leh pachhiate chu a khawngaih ang a, Mangangte nunna chu a humhim ang.