TIRHKOHTE 8:22
Amaherawhchu, i sual hi sim la, Lalpa hnênah ṭawngṭai la, i ngaihtuahna sual hi a ngaidam mial mahna che.
Mihring kan nih chhûng hi chuan tihsual leh tihpalh nei thei vek kan ni a. Amaherawhchu tihsual leh tihpalh avânga insiamṭhat tum lo leh hmasawn tum lo mi tam tak an awm ṭhin erawh a pawi hle a ni.
Kum 6 mi lek anih lai chuan naupang ngaihtuahawm tak a ni a. Vawikhat chu a school zirtirtute chuan lehkha phêk an hawntir a. A chhûngten an han chhiar meuh chuan, ‘Lehkha zir tur chuan mi lâk tlâk loh’ tih hi a lo inziak a.
A school luhna aṭang chuan bân a ni hial a. Chu naupang chu Thomas Edison-a a lo ni reng mai! Vawiinah chuan tunge a nih kan hria e. American mithiam, thilsiam chhuaktu leh hmuchhuaktu ropui a ni.
Tipalh emaw tisual bik ṭhin leh hlawhchham bik ṭhina kan inhriatna hi dah bo daih tur a ni a, ‘Engatinge hetiang thil hi ka tawn reng bik ṭhin le, mitṭenkhatte erawh ṭha takin an zo zel a’ tih loh tur a ni.
Harsatna leh tihpalh thil tawng lo kan awm lo a, kan beisei loh leh kan rin loh thil engemaw tawng ṭhin vek kan ni. Midangte nena kan danglamna chhan zâwk Chu tihpalh leh tihsualna hmun aṭanga tho chhuak leh tho chhuak lo kan awm vang mai a ni.
Lloyd Morris-a khan, “Tihsual nei ngai lo awmchhunte chu engmah ti ve ngai lo te an ni” a ti. A dik hlê. Mi zawng zawngin tihpalh emaw hlawhchhamna emaw kan nei vek a ni tih kan hriat a ṭha hle.
Kan tihpalh emaw kan tihsual emaw kan bawhchhiat emaw kan hlawhchham anih pawhin ṭawngṭai ila, Pathian ring tlatin insiamthar ila beseina nên hma lam kan pan leh tur a ni.
EFESI 4:32 – Inkhawngaih tawnin inlainat tawn ula, Pathianin Kristaa a ngaidam che u ang hian inngaidam tawn rawh u.