1 PETERA 1:3
Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a.
London khawpuia Wembley Stadium-a Dr. Billy Graham-a rawngbâwlna hlawhtling tak chuan khawpui a tuam hneh hle a. Chanchinbu leh TV lama chanchinthar-ah thlengin an chhuah chuai chuai a, chutih hunlaia Great Britain Prime Minister chu Sir Winston Churchill a ni.
Prime Minister chuan chu chanchin chu a lo hriatin Billy Grahama chu hmuh a duh a, lêng turin a sâwm ta a, Billy Grahama pawh phûr takin rawngbâwlna a neih zawhah a lêng ta a.
Prime Minister ṭhutna bulah chuan chanchinbu hrang hrang, Billy Grahama rawngbâwlna thu inziak chu a awm nual a. Prime Minister chuan, “Tlangval, zawhna ka zâwt duh che a ni. Khawvêl hi a chhe tawh êm êm a, harsatna leh indonaten min tuam vêl tawh a, chuvangin kei putar hi beiseina min pe thei ang em?” a ti a. Hetih hunlai hi Indopui II-na zawh vêl lai kha a ni.
Billy Grahama chuan hun remchâng tak a ni tih hriain rilru ṭawngṭaina nen Bible a keu a, Prime Minister hnenah chuan chhandamna kawng te, mi zawng zawng tâna Pathian khawngaihna chungchang te, a malsâwmna leh a lo kal leh dân tur te thlengin a hrilh a, a lo kal leh dâwn avângin Krista-ah chiah beiseina nung a awm thu a hrilh ta a ni.
Khawvêlah hian engkim nei mah ila Lal Isua kan neih chuan loh chuan kan nun a ruak tlat ṭhin a, thinlungin zawn rûk leh beisei rûk a nei ṭhin. Chu nun chuan khawvêlin a pêk theih loh Lal Isua a neih erawh chuan beiseina thar a nei a, thlamuang takin a awm ṭhin a ni. Lal Davida pawhin, “Pathian chu ka nghâk fan fan ṭhîn a, Amah chauh hi ka innghahna a ni.” a ti a ni, Sam 62:5.
SAM 31:19 – Nangmah ṭihtute tân thil ṭha i va khâwl khâwm tam êm! Mi dang hmuha nangmah bêltute tân i tihsak chu.