JOHANA 3:16
Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.
Indopui pakhatna lai khan British tlangval pakhat, Bert-a an tih chu na taka hliam tuarin a awm a. A ṭhianpa, ‘Tiny Tim-a’ chu a kiangah a awm a, ani chuan hmun him lamah a hruai ta a. Bert-a chu a thi mai dâwna a inhriat avângin a ṭhianpa Tima hnenah chuan, “Ṭhiana, khawngaihin kawng min hrilh rawh?” tiin a ngên a.
Tim-a chuan chhân ngaihna a hre mai bik lo a. Vawi tam tak a zawh hnu chuan Tim-a chuan sipai tawmna khuarkhurumah chuan a ṭhiante chu a zâwt ve lehchhawng a. Bert-a chu hliam tuar a ni bawk si a, a zawhna a chhânsak theih loh avângin Tim-a chuan hrehawm a ti hle a. Ṭanpuina a zawn sak a ni.
Tumahin an chhân theih mai loh avângin a beidawng êm êm a, mahse a tâwp a tâwpah chuan mipakhat chuan zawi sapin, “Kan ṭhiana chu thi mai tura a inngaih avângin Vanram kawng a hre duh a nih chu. Tumahin in chhâng thei lo tih ka hria a, a pawi ka ti hlê. A kawng chu ka hria a, mahse ka awmna ata hi ka kalsawn a thiang rih lo” a tih pah chuan a kawrhma ipte-a Thuthlung thar bu tereuhte chu a phawrh a, a keu a, Johana 3:16-na chu keusakin, “Hei hi va chhiar tir la, a kawng chu a hria ang” a ti a.
Tichuan, Tim-a chuan a ṭhianpa Bert-a chu a chhiar tir ta a, Pathian hnathawh a chungah a lo lang a, a thlâ a muang ta êm êm a. A tûk zingah chu Bible, Thuthlung thar bu chu a âwmah kuah chungin a thi ta a ni.
JOHANA 14:6 – Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo.” a ti a.