ROM 12:2
Tûnlai khawvêl awm dân ang hi ṭâwm suh u; in nun phung chu, in rilru tihthara awmin, tihdanglam ni vek rawh se; tichuan, Pathian duhzâwng, ṭha leh lawm tlâk leh ṭhat famkim chu in hrethiam thei ang.
Kan hma hun tur te kan ngaihtuah ṭhin a. Kan duh ang leh kan tum anga thil a kal loh chuan a êng zâwng emawa rilru neih a harsa ṭhin hlê a ni. Phûr taka hna thawh te a har a, tha hi a zawi ngawih ngawih thei hial a ni. Chung chu mihring kan nih avanga nei kan ni a, amaherawhchu ringtuten beiseina leh rinna kan neih hi theihnghilh lo ila, eng dinhmunah pawh dingin mihring ngaiha chhe ber thleng pawh nise Pathian hnenah tlûkluh nachâng kan hriat hi a pawimawh takzet a ni.
Isaia 40:31 ah chuan Pathian thu mawi tak hetiang hian kan hmu, “Lalpa nghâktute erawh chu An chak thar leh ang a, Mupui angin thlain an thlâwk chho vang, An tlân ang a, an chau lo vang, An kal ang a, an hah hek lo vang.” tiin.
Beverly Garland-i, Hollywood actress pawh lo ni tawh chu Hollywood khawthlang lamah Hotel a siam ve a. Mahse chu hmuna awmte chuan amah an hriat em avang leh an nêl êm avangin an Hotel awm man te an pe ṭha lo a, ba hlîrin an khat a. Tui bill, electric bill, bungraw chhia siam man te, ei leh in tur buatsaihnan te, hlawhfa rawih nan te pawisa a ngai zel bawk si a. Harsatna lian takin a tlakbuak a nih kha.
Chutihlai chuan a naupanlai aṭanga a pain a hrilh fo ṭhin, “I thinlung kawngkhar vengtu ni tlat la, thil ṭha lo engpawh; lungngaihna te, manganna te luh tîr phal reng reng suh ang che” tih thu chu a hrechhuak ṭhin a ni.
A thinlungah chuan huaisenna a dah a, Pathian a au a, a ring tlat a, beiseina leh hmangaihna leh dikna a dah tlat a. Filipi 4:4 chu a innghahna a ni a. Kum tam tak a liam meuh chuan Hotel ṭha leh ropui tak a nei ta hial a ni.
Harsatna te hi keimahni mai chuan kan tuar chhuak thei lo a, Pathian kutah inkawltîrin a lam hawi ila, harsatna ngam lotu nilovin harsatna hnehtu kan lo ni zâwk dâwn a ni.
SAM 46:1 – Pathian chu kan inhumhimna leh kan chakna, Mangan laia ṭanpui var ṭhîntu hnai reng a ni.