1 JOHANA 3:1
Ngai teh u, Pain min lo va hmangaih nasa êm; Pathian fa-ahte min vuah tâk hi! Chutiang chu kan ni rêng e. Hemi avâng hian khawvêlin min hre lo va ni, amah chu an hriat loh avângin.
Lungkertu hian fapa fel tak a nei a. Tlaikhat chu a hnathawhna hmun, lungalhthei khur lâwn chhuahna bulah chuan rawn kalin a pa chu a lo hmuak a.
Mi tam tak an rawn chhuak a, an kal pêl zêl a, an hnathawhna hmunin a zir em avangin an rawn bâl hlawm êm êm a, an hmai te chu a dum nuau hlawm a, naupang chuan tute nge an nih a hre thei hauh lo.
Rei tak a pa a nghah hnu chuan a lo la lang thei si lo a, hnathawk ṭhenkhatte chu an haw zêl mai bawk si a. Nakin deuhah chuan mi pakhat hian, “Mama, tunge i nghah a, engnge hetah i tih?” a rawn ti a. Naupang chuan, “Ka pa ka nghâk, a la rawn chhuak ve lo a” a ti a.
Chupa chuan, “A ni maw, mahse engtinnge i pa chu i hriat theih ang? Mi tam tak chu an hnathawhna avangin an hmai a bâl vek a, tu nge an nih pawh a hriat theih tawh loh a. I pa chuan a kalsan tawh che a ni ang, haw tawh zâwk mai rawh” a ti a.
Chu naupang chuan, “Ni e ka pu, ka pa hi ka hre thei dawn lo tih chu ka hre reng, mahse a rawn chhuah hunah amah zâwkin min hre dawn a, ka lam a rawn pan mai ang” tiin a chhâng a ni.
Hetiang deuh hian kan pa Vana mi chuan a fate a hre reng ṭhin. Amah hnaih duh lovin tisa khawvêl lamah tlanbo ṭhin mah ila, amah mamawh-a kan beisei hunah min lo hre reng ṭhin a ni. Johana 1:12-ah khan amah ringtute chu fa nihna a pe tih kan hria a. Khawvêl mi mahin a fa a hriat hran theih a, a kaihhruai chuan Pa Pathian chuan a hre reng ang tih rin tur a ni.
Johana 14:27-ah chuan tihian kan hmu, “Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se.” tiin.
1 JOHANA 4:11 – Duh takte u, Pathianin chuti taka min hmangaih si chuan, keini pawh kan inhmangaih tawn ṭheuh tûr a ni.