JEREMIA 17:11
Kut tling lova hausa chu varung, mahni tui ni lo awp keu ang a ni, A vânglai takin a hausakna chuan a kalsan ang a, A âtzia a la lang mai ang.
Hetiang hian sum chungchang an sawi ṭhin:
Sumin khum a lei theih, mahse muthilhna a lei tel thei lo.
Lehkhabu a lei thei a, mahse thluak a lei thei lo.
Ei leh in a lei thei a, mahse hriselna a lei thei lo.
In a lei thei a, mahse hlim taka chênna a lei thei lo.
Damdawi a lei thei a, damna a lei thei lo.
Nawmchenna min pe thei a, mahse chhandamna leh thlamuanna min pe thei lo.
Hetiang hian sum a insawifiah ṭhin:
“I kutin min chelh tlat la, i ta angin min sawngbawl ang che. Chutihrual chuan ka ta i ni ve nghal tho tih hai lo la. Ka thuhnuaia i awm theih dan chu a awlsawm hle tih hria ang che.
Ka thuhnuaiah chuan mi chi hrang hrang an awm a, keimah avangin thil chi hrang hrang a thleng bawk ṭhin tih hria la. Pathian siam ka ni a, Setana hmanraw ṭangkai tak ka ni thung. I ta ni turin ka inhawng reng a, chuvangin fimkhur leh fing takin min hmang ang che. Chuti lo zawng i bawih ni lovin ka bawih-ah i ṭang palh ang e.”
Aw le, sum tam tak mamawhna khawvêlah kan cheng ta, engpawh ti dawn ila, sum tel lo chuan hmalâk a theih meuh ta lo. Chutihrual chuan Pathian thu-ah sum ngainat chu sual tinreng bul a lo ti bawk si. Ringtu tan chuan fimkhur a ngai takzet a ni.
Engpawh nise hetiang a nih avang hian hian sum nihna leh a hnathawhte kan hriatchian a pawimawh em em a. Sual tinreng bul laka inveng turin mahni ṭheuh kan pawimawh hle.
1 TIMOTHEA 6:10 – Tangka sum ngainat hi sual tinrêng bul a ni, sum ngah an tumna lamah ṭhenkhat chuan rinna hi an pênsan a, lungngaih sawi sên lohvin mahni an intina ta a ni.