HRUAITU ARSI ANGIN

THUPUAN 22:16
“Kei Isua hian, kohhrante hêng thu hrilh tûrin ka vântirhkoh ka rawn tîr a nih hi; Davida zungzâm, a thlah, vârparh arsi êng chu ka ni,” a ti a.

Krismas hun kan hmang mêk a. Krismas chanchin sawi dawn chuan Mary leh Josefa chanchin aṭang te, Berampu aṭang te, Angel aṭang te, Heroda aṭang te, Mifing pathum aṭang tein sawi tur tam tak a awm thei ang. Mifing hruaitu Arsi êng tak khan thu pawimawh tak (message) a keng niin mite chuan an sawi fo ṭhin bawk.

Vanah khian Arsi tam tak an awm a, mahse an zîngah chuan Arsi êng tak pakhat, Nausen Lal Isua hnêna mifing leh beram vêngtute hruaitu a awm anih kha. Kha Arsi kha awm lo se, Lal Isua pianna hmun kha engtin nge an hriat theih ang, zankhua-in an zawng ang a, kawng an bo viau mai thei a ni. Mahse chu Arsi chuan Lal Isua hnênah mifingte chu a hruai ta zâwk a nih kha. Lal Isua tân a ên tlat vang a ni.

He Arsi ang hian keini pawh kan êng ve tur a lo ni. Isua Krista hnenah midangte a hruai thleng ang hian kan khawtlangah, kan kohhranah, kan chhungkuaah, kan ṭhiante zingah hruaitu Arsi kan ni ve thei a ni. Chu Krista Arsi êng tak anga kan nun êng danglam bîk leh mawia kan hman chuan sual thimin a tuam vêl hi kan ên ngei bawk ang.

Mifingten he Arsi hi Arsi dang nena an hriat hran theih ang hian, keini pawh he Krismas hunah hian suahsualna thil kârah Krista tâna danglam bîkin min min rawn hmu ve rawh se.

Inawmtleina khawvêla ṭhiante nena hun hmang ral mai mai lovin Krista hnêna midangte hruai thlen hi kan tum ber tur chu a ni. Kan Lal lo piang tân hian Arsi êng tak nih i tum ṭheuh ang u.

Arsiin Krista hnêna mifing a hruai ang hian kan nun hian Krista hnenah midangte hruai ve rawh se.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy