DAMNA DIK LEH THIANGHLIMNA TAK

DAMNA DIK LEH THIANGHLIMNA TAK

– VANLALNGHAKI

A kum chiah ka lo chhinchhiah tawh lo a, Gospel camping aṭangin Thlaraua Piantharna ka chang a. Chhandam nih inhriatna hlimna leh lâwmna nasa tak ka nei a. Ka hlim êm êm a, ka nun hi eng harsatna mahin a tibuai phâk ngai lo.

Mahse hun a lo kal leh deuh a, ka pianthar hma a ka ngaihzawng nên kan inṭhen thei silova, a ngai te bawkin kan awm a. Lalpa duhdan ni miahlo inngaihna sualah ka tlu leh ta a. Mahse englai mahin hlimna ka nei ngai lo a, a châng phei chuan, “Lalpa he ka taksa hi i duh loh zâwng ti thei lo tawp tur hian min tihchhiatsak la, nangmah ka hnaih a ka pên bosan lohna tur che anih chuan ka lawm tho ang” ka ti ṭhin.

Tichuan hun a kal zel a, Lalpa ka bosan thui tulh tulh a. Amah ka hlat telh telh lai chuan min koh lêtna ka dawng ta nawlh mai a. Ka ṭawngṭaina ka hrechhuaka mahse ka ṭawngṭai chhânna chu ka beisei loh lam daih a ni si! Ka ngaihzawng ka hmangaih êm êm chu a dam thei reng reng lo mai a. Test hrang hrang an ti a, a natna an hmu thei lo a. A tâwpah rinloh lutuk maiin HIV anih thu hriat chhuah a ni a, ani a kai chuan keipawh chiangsa ka ni si! ka va’n ṭap nasa êm! A rang thei ang berin ka in test ve nghal a, a chiang êm êm mai si!

Mahse Lalpa hian he natna hi ka tuar tur atân nilovin min khalh kal na tur atâna min pêk a lo ni zâwk reng tih min hriattir a. Ka ngaihzawng hi naupang tê, ngaihzawng pawh la nei ngai lo a ni a. Keichu nuthlawi ka ni, ka fate ka pailai in HIV test a kim thlap in ka ti a, ka fihlim si a. He natna hi engtianga kai nge ka nih ka ngaihtuah ngial pawhin a chhan tur awm rêng rêng kan hre thei lo.

Mahse he natna vâng hian Lalpan a lam hawitur in min koa, thil tam tak min zirtir a duh a lo ni reng si. HIV ka nih ka hriat hmâ khan ka nundan mipat hmeichhiatna nupa ni loa hman kha pawi ka ti êm êm lo va, mahse, HIV vei te ka thinhrik ṭhin. Mahse he natna ka neih hnu hian HIV nilovin mipat hmeichhiatna hman khawloh zâwk hi ka thinhrik ta a. Lalpan thianghlimlo a tih chu thianghlimlo ka lo ti ve thei ta.

Tichuan ka taksa a thianghlim nia ka hriatlai khan Lalpa ah chuan ka lo bawlhhlawh êm êm a, mahse ka Taksa hi khawvêl mite ngaiha thianghlim zo ve ngai tawhlo tur a ni tih ka hriat hnu hian Lalpan thianghlimna kawng min hrilh ka hmuhchian êm avangin Lalpa ah chuan ka lo thianghlim tawh zawk si!

Tunah chuan he natna hi kawl reng mah ila harsatna min siam lo a, a chhan chu natna zawng zawng te chung pawha thuneitu, lei leh van siamtu Pathian hi ka chunga roreltu anih avângin natna hian min tibuaiin min ti na phâk ve si lo.

Tunah chuan Damna dik tak taksa mai nilo thlarau thlenga damna ka nei a, ka hrisel êm êm a ni. Ka thianghlim a, Krista thisenin min silfai tawh miau avangin, van kai tlâk nun pawh ka nei si. Lalpan thianghlima min pawm hi ka tan a tâwk a ni.

LALPAN malsawm rawh se.

8 Comments

  1. Ava ropui ve aw… Lalpan malsawm zel che rawh se..

  2. Ava ropui em, ka chhiar zawh a ka rilru a awm hmasa ber chu ‘Van nun hlutzia ka hriat theih nan Hringnun nepzia min hriattir thin’ tih hi

  3. Amen.Lalpan malsawm zel che rawh se

  4. Amen Lalpan ropui reng rawh se

  5. ava tha em

  6. A ngaihnawmin ava ropui ve aw.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.