THUHRILTU 2:23
A dam chhûng chu buaina leh manganna hlîrin a khat a, zânah pawh a muhîl thei lo. Hei pawh hi a va ho êm!
Thuhriltu hian mihring damlai ni chu tuarna hlîra khat angin a sawi a. Juda-ho khuan tuarna chungchang hi an buaipui nasa hle tawh a. Miin vanduaina engemaw a tawh chuan a sual vânga tuarah an ngai ṭhin. Joba pawh kha a ṭhianten a sual vânga tuarah an ngai a (Job.4:7-8); pian tirh ata mitdel Lal Isuan a tihdam pawh kha a zirtirte chuan ama tihsual emaw a nu leh pa tihsual emaw ni turah an ngai a, mahse Lal Isuan Pathian hnathawh a chunga a lanna tûr anih zâwk thuin a chhâng (Joh.9:1-3).
Tuarna hi a thim zâwnga thlîrtu tân chuan ânchhia ang hialin a ngaih theih a. Pathian en chunga miin a tawrh chuan malsawmna ropui tak thlentu a ni thei. Josefa leh Daniela leh a ṭhiante tuarnate pawh kha an tân kaisânna a ni a, mi dang tân malsawmna a lo ni ta zâwk a nih kha (Gen.37-41; Dan.3-6).