SAM 150:1-6
Lalpa chu fak rawh u. Pathian chu a hmun thianghlimah chuan fak ula; A thiltihtheihna boruak zau takah khian amah chu fak rawh u. A thiltih ropui takte avângin amah chu fak ula; A ropui nasatzia ang zelin amah chu fak rawh u. Tawtawrâwt riin amah chu fak ula; Perhkhuang leh ṭingṭangin amah chu fak rawh u. Khuangtê leh lâmin amah chu fak ula; Ṭingṭang chi hrang hrang leh phênglâwngin amah chu fak rawh u. Dârbenthek ri thûm miin amah chu fak ula; Dârbenthek ri fiak miin amah chu fak rawh u. Engkim, thaw thei tawh phawt chuan Lalpa chu fak rawh se. Lalpa chu fak rawh u.
He Sam hian zawhna pawimawh tak tak pali – Khawi hmunah nge Pathian kan fak ang? Eng vanga Pathian fak tûr nge kan nih? Engtin nge Pathian chu kan fak ang? Tute nge Lalpa chu fak ang? tih zawhnate hi a chhâng nghal a. He Sam phuahtu hian Pathianin fak a phuzia leh a ropuizia a hmu chiang hle mai. Pathian ropuina hmu chiang apiangin an fak tam ṭhin.