EPHESI 5:3-4
Nimahsela, mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se; zahmawh te, thu lawilo sawi te, fiamthu te pawh, chûng chu a mawi lo a ni; chûng tih ai chuan lâwm thu hrilh zâwk rawh u.
Fiamthu duh tak leh thiam tak bula awm hi a nuam hle. A thiam tân chuan eizawnna awlsam leh zangkhai tak pawh a ni awm e. Lal Isua khawvêla a awm chhûng khan a ṭap tih kan hria a, hla a sak pawh kan hria a, thu a sawi leh a zirtîr te pawh kan hria a; a nuih thu erawh chu hriat tûr a awm hauh lo thung.
Tirhkoh Paula’n lam rîk loh tûr zînga fiamthu a târlang tel hi chhût tham tak a ni. Fiamthu hi thu lawi lo leh zahmawhte nên a kal kawpna chin a awm a. Ṭhenkhatin ‘Paho ṭhukhawm an nuih dar dar hi chuan zahmawh an sawi a ni ṭhin’ an tihte pawh hi a dikna chen a awm. Fiamthu thawh hian ramri kham thiam a harsa a, thu bawlhhlawh leh mi huat zâwngte pawh sawi a awl a, chuvângin Paula hian a duh vak lo a niin a rinawm.