THUHRILTU 2:1-2
‘Nawmsip bâwlin nuam ka han tâwl teh ang,’ ka ti a. Chu pawh chu a ho khawp mai. Nuih hi a âtthlâk hle a, intihhlim pawh a sâwt lo hle tih ka hre ta.
He thu ziaktu hi nawmsipbâwlna lama lo tlân nasa tawh tak niin a lang. Hlimhlawp chi hrang hrang insiam a, a mit ît zâwng pawh hlah hauh lo khawpa lo tâl vêl tawh ṭhin a ni a. Mahse a tâwpa a hriat chhuah leh ṭhin chu engmah lo mai a lo ni tih hi a ni.
‘Khawvêl ka chên’ intihote hi khawvêl hian a lo chên zâwk a. Beidawnna leh lungngaihna khurah an tlalût ṭhin. Mahni in leh ram nuam tak tak chhuahsan a, sum pawh duh tâwk hman tur nei khawthlang nula leh tlangvâl hote pawh khuan nawmsipbâwlnaah hian an mamawh chhânna an hmu zo lo. Fapa tlân bo anga kan bona ram aṭanga Pa hnêna kîr mai hi a pawimawh. Pa in chhûng aṭang hian nawmsipbâwl dân dik tak a lo awm zâwk a ni.