– Chhantea (Oriela patea)
E. Lungdar
KṬP, ṬKP, SAY, PYD etc. ṭhalai ah a virviak leh inhmang, a kûl a tâia thiltihnaa hawlh lawr leh chhuan, nula tlangval fel tak, mahni inchhûnga room a inkhung bo tlat. Chhûngte tâna biak ngam loh khawpa tûm bûr ṭhin i ni em? Mahni inenfiah teh.
Khawlaia nuih duh leh mize kawm nuam, ṭhenrual huikhawm thiam leh mi men zau tak, mite ngainat rawn tualzal nuna ni si hian chhûng leh khat laina, tu leh fa te ṭihkhai i lo ni reng ang e. In enfiah teh.
Midang nun a tehna lek uluk êm êm. Mahni tel ve lohna a mite thiltiha phunchiar leh duh dik tak. Mahni in tih ve a eng ruai ni bik silo i ni ang e. In enfiah teh.
Kohhran leh NGO-ah nula tlangval chhuanvâwr. Mahni inchhûng ah Sâmdala i lo ni reng ang e. In enfiah teh.
Nihna in kohhran rawngbâwlnaa a chelh din hram hram. Sual haw lo ringtu/rawngbâwltu. Mahni thlarau nun ngei pawh rorêlna nî atâna thlamuang lo i lo ni ang e. In enfiah teh.
A huho a sual ruihhlo do em em a. Mahnia chûng sual te chu buan hneh leh si lo. Mahni pindan ril chhûnga sual do leh ngam lo i lo ni ang e. Pathianin a hmu reng che. In enfiah teh.
Zahawmna hi incheina leh chanvo ah a innghat emaw ti tu i ni palh ang e. In enfiah teh.
Aw le… heng zawng zawng hi a sawitu ngei pawh ka nihna tam tak a awm. Heng thil te tlânsan a, a ṭha lama ke pên a kan nun siamṭha tur hian midang pun buai zuk ngai hauh lova. Mahni leh kan duhthlanna hi a lo pawimawh ber. Rawngbâwlna kawng bîk ah hian kan hmaih palh awm fo a ka hriat ve chu rawngbâwlna chanvo leh hna tam tak kan chelh a, kan thawk bawk a. A ṭha êm êm e. Mahse chumi innghahna leh kan rawngbâwlna chanvo neitu bulpui Bible chhiar leh ṭawngṭai hi kan kal pêl fo lo maw? I inenfiah ang u.