1 PETERA 2:2
Nausên piang hlim angin thlarau lam hnutetui eng mah pawlh loh chu châk rawh u, chutiang ring chuan in ṭhang lian thei ang a, chhandam in ni dâwn nia.
Khawvelah kan lo piang chhuak a, engkim mai chu a thar vek mai a. Kan pianna chhûngkua chu kan chhûngkaw thar a ni a, midangte pawh chu mi thar vek mai an ni. Thil zawng zawng chu mak tihnain kan lo khat ṭhin. Chu naute lo piang chu lawm turin mi zawng zawngin en kan tum bawk ṭhin.
Hetiang deuh hian mi kan lo pianthar hian, vân mipui zawng zawng chuan min lo lawm ṭhin a. Kan tihsual tawhte simin insiamtharna chu keimahniah a rawn inṭan nghal bawk. Kan chhûngkaw thar chu Pathian chhûngkua a lo ni ta a. Kan pa ber, Pathian chuan min lo enkawl tawh ṭhin.
Pathian enkawlna hnuaiah chuan kan lo ṭhanglian zel a, thil tih tur chi hrang hrang te chu kan lo hmachhawn zel a. Thlarau lama ṭhang tura ke kan pênna kawngah tlûk leh din kan fâwm fo ṭhin.
Nausente hi an duhawm em em a, an hmêlah chuan thianghlimna leh ṭhatna a lang ṭhin. Chu duhawmna leh thianghlimna chu Pathian hian nei chhunzawm zêl turin min duh a, Lal Isua ngei pawh khan, “Thu dik ka hrilh a che u, in inlamlêta naupang tê ang hi in nih loh chuan vânramah in lût tawp lo vang” a ti anih kha (MATHAIA 18:3).
A ṭawngṭainaah pawh khan, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che.” a ti (MATHAIA 11:25).
Kan lo pianthar hian Thlarau lamah chuan nausen mai niin ṭhanglian zêl tur kan ni.