SAM 42:11
Engtizia nge ka ngui êma, Ka rilru a hah tâk êm le? Pathianah chuan ka innghat ang a, Min chhandamtu hmêl chu hmuin ka la fak ang.
He Sam hi ‘Saltâng ṭawngṭaina’ a ni a. Juda saltâng-hote khan Jerusalem-ah chauh lo chuan Pathian biak theih tûrah an ngai lo va. Babulon rama an saltânna hmun aṭangin Jerusalem an ngai ngawih ngawih ṭhin a ni. He Sam phuahtu hi Pathian biakna lamah pawh dinhmun pawimawh tak luahtu a ni a. A saltân hrehawm tihna chuan nasa takin a pawt kun a, Pathian ngei pawhin a theihnghilh ta hialah a ngai a ni. Chutianga hrehawm ti taka a van ruai ruai lai chuan Pathian, amah tidam theitu beisei tûr a awm a ni tih a hre chhuak leh a. Kun reng mai lova tho chhuak tûrin amah a insâwm ta zâwk a ni.
Khawvela kan awm chhûng hian lungngaihna, manganna leh ṭahnaten min chîm fo dawn. Hetiang hunah pawh indawm kun mai lovin, Pathianah beiseina neia tho chhuak tûr kan ni zâwk a ni tih i hre thar leh ang u.