– Chhantea (Oriela patea)
E. Lungdar
(A che che sih hlawkah)
✝ Tumah kan inngaisanglo tawn a. A neih ka eilo tih ṭanin kan ṭang a. Pathian thu erawh chuan mahni aia mi dang ṭha zâwkah ruat tûrin min ti a, keini chuan kan thei lo. Mahse ringtu tho kan ni.
✝ Mihring leh mihring nulât tlangvâl inhmangaihna hi sex hmanga bulṭan tûr emaw kan ti tawh a. Mihring leh mihring inhmangaihna pawh man thiam lo hian Pathian hmangaihna (agape) hi kan man pha lul tawh lo hian ka ring ṭhin. Mahse ringtu tho kan ni.
✝ Pathian thuawihna hi biak in chhûng atân kan ti a. Kan pâwnlam nun eizawnna leh khawsak phungah erawh chuan a thuawih kan tum si lo. Ringtu tho kan ni.
✝ Eirûkna thup bo nân thawhlawm in thawh tam siakah ṭan kan la a. Pathianin a lawm êm êm mirethei thawhlawm, a neih chhun tak meuh meuh thawh aiin a thawh tam tam kan la chawimawi zui a. Ringtu tho kan ni.
✝ Ruihlo ngaite, nawhchizuarte, kan ṭawngṭaipui a. Chhandama an awm chu sawi loh… kan ina zan khat riahtîr pawh kan phal si lo. Khawiah nge chawlhna an hmuh ang? Kan kâ chiah hian kan hmangaih a. Mahse Isua chuan, ‘Nawhchizuar ten vânram an luhkhalh ang che u’ a ti mauh si.
Sawi tûr a tam, kan sawi sêng lo. Kan vantlâng nun, chhungkaw nun, mimal nun ṭheuh hi i inbih chiang ila. Midang siamṭha hmasa lovin mahni hi i insiamṭha ngam ang u. Mitin Lalpa hmaa inpuang tûra khûp tinrêng kan ṭhingṭhit hunah hian engnge ka sawi ang tih ngaihtuah ila. He ka nun mêk hi chumi huna sawichhuah tlâk chu a ni em tih ngaihtuah ang u.
LUKA 14:11
“Inngaihlu apiang an tlâwm ang a, inngaitlâwm apiang chawimawiin an awm ang,” a ti a.