1 KORINTH 3:21-23
Chuvângin, tu man mihringte hi chhuang suh se, engkim hi in ta vek a ni si a; Paula emaw, Apolova emaw, Kifa emaw, khawvêl emaw, nunna emaw, thihna emaw, tûn hun emaw, nakin hun emaw, azain in ta a ni. Nangni pawh Krista ta in ni a, Krista pawh chu Pathian ta a ni.
Khawvela kan awm chhûngin chhiatni ṭhatni nei ṭhinte kan ni a. A enga mah kan duh vang emaw duh loh vang emawa chan reng theih pawh a ni chuang lo. A tlângpuiin ṭhatna lam hi dawnsawn a nuam a, kan hrethiam tlângpui bawk a, chhiatna lam erawh chu kan chunga a lo thlenin hriatthiam harsa kan ti fo ṭhin.
Kan Bible-in ‘Engkim in ta’ a tih miau avang hian mi chan tûra kan dahte pawh kan in chhûngah a lo thleng ve thut thut thei a, inring renga awm a pawimawh. Engpawh lo thleng se, lungawi taka kan dawn thiam a ṭul ṭhin. Kan chunga lo thleng lo tûra kan duh êm êm te pawh Pathian ropuizia kan hmuhna tûr a lo ni ṭhin.