MATHAIA 6:33
A ram leh a felna chu zawng hmasa zâwk rawh u; tichuan, hêng zawng zawng hi a pêk belhchhah dâwn che u nia.
Thil tihnaah rêng rêng a kalhmang hriat chuan a sâwt bîk ṭhîn a. A hnuhnung tûr hmasaktîr tum tlat te hian a sâwt loh bâkah tha thlâwn sên a awl ṭhîn. Kan Lal Isua hian mihringten ei leh in leh silh leh fên kan mamawh tih min hriatpui a, kan mamawh tih kan Pa vâna mi pawhin min hriatpui thu a sawi. Amaherawhchu hei aia dah hmasak tûr leh ngaih pawimawh hmasak tûr min hrilh a, chu chu a ram leh a felna zawn hmasak a ni.
Khawvel thil kan ngaihtuahna lamah tam tak chu kan buai êm êm a. Chatuana nunna leh thlarau lam thil ngaihtuah hman lêk lovin hna kan insiam a. Khawvel a boral ruala boral mai tûr thilah kan inham buai vak ṭhin. A duh zâwnga nung a, amah dah pawimawh hmasa a, thlarau lam thil ngai pawimawh hmasate hnenah chuan tisa lam mamawh pawh tam zâwk pêk a tiam a ni. Hmasa zâwk tûr hmasak tîr a, a malsawmna tam tak leiah pawh min dawn tîr hi kan Lal Isua duh dân a ni.