MATTHAIA 6:19-21
“Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u; vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u; i ro awmna apiangah i rilru pawh a awm ang.
Juda-hovin an bungrua leh an ro ṭhate an thukruin an phûm bo ṭhin a, puan lam chi te chu a ei chhe theitu thîmin a ei châng a awm a, thîr lam chi chu tuiêkin a ei chhe ṭhin a; a ṭhen chu rûkruin an lo rûksak bawk ṭhin. Hetianga an tih ṭhin hi Lal Isuan a hria a, hetianga tih ai chuan ṭanpui ngaite ṭanpui nân te, Pathian rawngbâwl nân te hmang zâwk sela; chutianga an tih chuan vânah ro an khâwl khâwm a ni ti zâwngin Lal Isuan a sawi a ni.
Hausak hi sual a ni hauh lo, hausa thilphalte chu Pathian tân pawh hlu tak an ni. Kan sum hian mi rethei leh ṭanpui ngai te a thleng pha em? Pathian ram zau nân kan pe em? Pe lova kan khâwl ringawt a nih chuan vân lamah chan tûr rêng kan nei dâwn lo a ni.