JOHANA 15:4
Keimahah awm reng ula, kei pawh nangmahniah ka awm reng ang. Pêng chu grêp hruia a awm reng loh chuan a rah thei lo ang bawkin, nangni pawh keimaha in awm reng loh chuan in rah thei lo vang.
Khawvela lui sei ber, Mississippi lui kamah Theite kûng mak danglam tak a awm a. Englai mahin a hnah a tlakawlh ve ngai lo va, a hring reng ṭhin. A pâr a mawi êm êm a, a rah a tui hle bawk.
Chulai hmuna awmte chuan mak an ti em em a, a lâr hle bawk. A chhan mi tam takin an zawnga mahse an hmuchhuak thei si lo.
A rah ei apiang leh a kûng hmu apiang chuan neih an duh ṭheuhva. Tichuan an la a, an phun ve ṭhin a. Mahse rawn pârin rawn rah ve bawk ṭhin mah se, chu hmuna mi chu an tluk thei ngai lo a, a hnah a tla kawlhin a lo ro leh mai ṭhîn.
Chutiang taka danglam chu Scientist-te chuan a chhan an chhui chiang ta a. Nikhat chu a zung an lai a. Zung a lo nei thûk êm êm mai a, a zung zâm chuan Mississippi luipui kam lei ṭha a lo hîp phâk reng mai tih an hre ta a. Chuvang chuan a hnah a tla kawlh ve ngai lo va, a hring reng a, a rah a tui danglam bîk êm êm tih chu an hmuchhuak ta a ni.
Kohhran leh ringtu nun pawh, Thlarau lam luipui lei ṭha hîp phâk nun chu a hnah a tla kawlh lo va, a râu ngai lo va, rah ṭha a chhuah ṭhin a lo ni.
Bible chhiara ṭawngṭai reng mi chu Pathian pâwlna changin a nunah rah ṭha a chhuak ang.