— Chhantea (Oriela patea)
E. Lungdar
Ringtu, krista a nun nei tawh piangthar kan inti ṭheuhin a rinawm. Mizo kristian a bîkin kohhrana nihna leh chanvo nei te hi piangthar lo inti pawhin piangthar tûra kan ngaih leh kan beisei te an ni bawk.
Mizote hi kan kristian nun sakhuana hi huho nun a ni ti mai ila a sual lo ang. Chutih rualin piangthar nun erawh chu maltlat nun a ni. Mi dang nen ringtu nun kawng hi zawh ho châng awm mahse a laimu tak tak hi chu mimal nun a ni.
Kan biak bûk leh kan chanvo hlen leh thawhah chuan piangthar ṭha takah kan inngaiin mi pawhin min ngai a ni mai thei. Mahse hengah te hian miten piangtharah min ngai em le.
✝ Ration buhfai khûlnaah.
✝ Sa sêrnaah. Sa zawrhna hmunah.
✝ Gas vânlai tak a gas lâk naah.
✝ Tui sem chungchangah. Tui chhuah ni hian i thil tih kha a piangthar nun em?
✝ Huan lo ram ri hung thu-ah.
✝ I tuichhe paih dânah.
✝ Political party a i inhmanna-ah.
✝ I office hnaah. Mahni office ṭan hunah pawh i thleng lo fo em?
Heng lo pawh hi sawi tûr a tam. Mi min hmuh dân leh kan nihna leh chanvo, kan piantharna hi teh lo ila.
Hawh u khîng hmang khian mahni in teh ila. Mahni i inchhâng ang u.
JOHANA 3:5-8
Isuan, “Thu dik tak ka hrilh ang che, tuiah leh thlarauva piang lo chu tu mah Pathian ramah an lût thei lo vang. Tisa chuan tisa a hring a, thlarau chuan thlarau a hring a ni. ‘I piangthar tûr a ni,’ ka tih hi mak ti suh. Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge tih leh, khawiah nge a kal dâwn tih i hre si lo. Tu pawh Thlarauva piang chu chutiang chu an ni,” a ti a.