JAKOBA 1:15
Chu châkna chuan no a pai a, sual a hring a, a lo puitlin chuan thihna a hring ṭhîn.
Elton John-a kha Elvis-a hnua zaithiam hlawhtling niin album pawh copy 200 million chuang a hralh a. Mahse intihhlum a tum hial a. A testimony-ah chuan, “Kum 40 chhûng na tuarin ka hun ka hmang a, in vawn behna reng reng ka nei lo, ka hnaah chuan ka hlawhtling khawp mai, sum pawh ka ngah. Mahse ka nun erawh manganna leh hrehawmna hlîr a ni” a ti a nih kha. Khawnge a tân hlimna?
Tleirâwl fel tak pakhat hi a bialpain a rîm tluk tluk a, vawi tam tak thlêmna dovin a thianghlimna chu a hum ṭang ṭang a. Zan khat erawh chu an inhnimhnai rei deuh hlek avangin a tuar zo ta bîk lova.
Chuti chung chuan zawhna a la nei ta fan a, zawhna fin hmêl tak si, mahse mâwl tak mai hi a zâwt ta a. “Lo mu dûn ta ila engtin nge min ngaih ang?” a ti a. A zawhna chu a fin hmêl viau a, mahse a bialpa tân chuan chhân harsa lo tak mai hi a ni a, “Ka hmangaih zual sawt ang che” a ti a. A inpe ta nge nge a ni.
Mahse tlangval chuan a hmangaih zual sawt awzawng lo mai a, a reh zui ta tial tial a. Chu tleirâwl rilru na lutuk chuan mahni intihhlum hial a tum a, mahse an chhan hman ta hlauh va. Zan khat lek Lal Isua hre lova a inhawn zau hretna chuan a nun a tikehchhe hman a nih chu!
Kolossa 3:5-ah chuan ti hian kan hmu, “In khawvêl nun sual – inngaihna te, bawlhhlawhna te, hurna te, châkna sual te, duhâmna te (chu chu milem biakna a ni) hêngte hi tihlum rawh u.” tiin.
1 JOHANA 2:17
Khawvêl hi a châknate chawpin a boral mêk a ni. Pathian duh zâwng titu erawh chu kum khuain a awm reng ang.