ISAIA 1:21
Engtizia nge khawpui rinawm tak chu Nawhchizuar ang a lo nih tâk? Dik taka rorêlna, mi dikte chênna chu Tualthattute awmna a lo nih tâk hi le!
Tleirâwl fel tak chuan nau a pâi tlat mai, a bialpa nen chuan inpâwlna an nei bawk si lo a, a mangang êm êm a, a mualphona tur zawng zawng chu a ngaihtuah a, mi sawi dân tûr leh en dân tûr chu a ngaihtuahin hrehawm a ti hlê. Chu hmeichhe dinhmunah chuan ding ta ila kan nau pâi chu kan titla mai ang em? Chu tleirâwl chuan a nau pâi chu titla se zawng, khawvêl chhandamtu Lal Isua a piang lo ang.
Rawngbâwltu nupa khawsak chu a harsa ve hle mai a. Fa 14 lai mai an neih tawh hnu chuan a 15-na tur a pâi leh tawh si a. An retheihna te, fa tam tak an neih tawhna te leh khawvel mihring pung zel ngaihtuah ila, chu nau chu tih tlâk mai ṭhain i hriatpui em? An nau 15-na pâi lai chu tihtlâk tîr la chu e! Kum zabi 19-na rawngbâwltu lâr, John Wesley i that dêr ang.
Mingo hian mihâng tleirâwl kum 13 leka upa a pâwngsual a, nau a pâi ta mai a. Chu tleirâwl chhûngte chu ni ta la, nau tihtlâk mai i duh ang em? He naute hi lo piang chhuak lo se mihâng zînga Pathian hla satu zînga lâr berte zînga mi, Ethel Waters zâi kan hre lo ang.
Beethoven-a pawh hi a nuin a pâi lai hian chhûngkuain harsatna nasa tak an tâwk a. A pa a dam lo a, a nu chuan T.B. a vei bawk a, an fate an la tê si a. Pakhat a mit a del a, pakhat a ṭawng thei lo va. Beethoven hi lo piang pawh nise rualbanlo a nih a rinawm a, tihtlâk mai a châkawm hlê ang le. Mahse a nu chuan hun khirh tak pal tlangin German mi ropui, hla phuah thiam leh music thiam a lo chhuah phah tâ a ni.
Nau tihtlâkna hi tualthahna râpthlâk tak a ni a. Pathian pawi sawina lian tak a ni. Ti lo tûra hrilhtu pawimawh kan ni vek thei.