2 TIMOTHEA 1:5
I rinna takzia pawh ka hre reng ṭhîn, i pi Loisii neih, i nu Euniki pawhin a neih bawk kha nang pawhin i nei ta zêl a ni tih ka hria.
Timothea tih hi ‘Pathian chawimawitu’ tihna a ni. A pa hi Grik a ni a, a nu hi Juda a ni. A pi leh a nu bula awmin a seilian a. Rinna kawngah pawh a pi leh a nu kaihhruaina ṭha tak avangin amahah pawh hmuh tûr a awm a. Lustra leh Ikonion khuaa Kristiante pawhin an fak hle ṭhin (Tirh. 16:2).
Rawngbâwla Paula a zin chhuah vawi hnihnaah Lustra khua a lo thlenin Timothea hian a zui ve nghâl a. Paula nen an intawn aṭangin Paula thih thlengin kum 17 vêl chhûng zet chu Paula hnungzuitu rinawm berte zînga mi a ni. Naupangtea rawngbâwla chhuak ve a ni nain rin a kai em em a, chuvangin Paula pawhin a ngaina em em a ni. Rawngbâwlpui ngainatawm takte hi an hlu a, mi khei fek fek chîngte leh mi bula min rêl chîngte hi rawngbâwlpuite tân hlîng angin an mi chhun a nâ a. Timothea anga rinawm leh ngainatawm nih i tum ang u.