THUFINGTE 31:10
Nupui ṭha hmuh hi har tak a ni a, Lungmantam aiin a hlu zâwk asin.
Communist mi thiam tak pakhat chuan ‘thil dang hi chu a zir zawh theih mai zêl a, hmeichhia erawh hi chu ka zir zo thei lo a ni’ a ti a. A ni tak a, Pathianin hmeichhia a siam dân hi lehkhabua ziak tham a awm. Thufingin ‘hmeichhe khawsak ṭha’ a tih hi ‘nupui fel’ tihna a ni a. Chhûngkuaa dinhmun pawimawh tak luahtu nuhote an in en nan hetiang hian han tarlang ila –
Nupui fel chu –
• Eng mahin a tehkhin phâk loh khawpa hlu a ni.
• A pasal tân a rinawm a, engkimah a rintlâk.
• A taima a, a phunchiar ve ngai bawk lo.
• Hmâ taka thovin a chhûngte rawng a bawlsak ṭhin.
• Mi rethei leh ṭanpui ngaite a ṭanpui ṭhin.
• A pasalah a nupui felna miten an hmu ṭhin.
• Chhungkaw khawsak a rêl fel a, a inthlahdah ngai lo.
• Pasal leh fate fak a hlawh ṭhin.
Kan pasal leh kan fate fak kan hlawh pha em le?