HLA THLAN KHAWMTE 4:1
Ngai teh, i mawi e, ka hmangaih, ngai teh, i mawi e; Ṭhuro an iang e, i mitten, i hmai khuhna phênah chuan.
Ngaihzawng neih hi chi thlah malsâwmna nei tûra a kailâwn hmasa a ni ve a. Mi thiamte chuan kum 12-14 inkâr vêlah mi pangngai chuan ngaihzawng an nei ṭan niin an sawi. Ngaihzawng neih hi suala puh ngawt chi a ni lo na a, hriattûr tam tak erawh chu a awm. Hêngte hi chhinchhiah ila –
1) Naupang taka ngaihzawng neih chu a ṭha lo.
2) Zirlai tân hlawhchhamna thlen theitu a ni.
3) Ei leh bâr tûr dehchhuah ve theih hma chuan ngaihzawng neih loh hi a ṭha.
4) Nupui pasala kan duh loh tûr chu ngaihzawn loh a him ber.
5) Chhûngte hriatpui leh duhpuia ngaihzawng neih hi a ṭha. Rem ti tlâng lova hmalâk hi chîn loh tûr a ni, tluan pawh a tluang duh lo.
6) Hmangaihtu dik tak chu a ngaihzawng tân a invawng thianghlim ṭhin.