RUALBANLO

1 TIMOTHEA 6:17
Khawvêl mi hausate chu inchhuang lo tûrin hrilh la, sum rin tlâk loh rin chhan tum lova engkim kan hman atâna min petu Pathianah innghat zâwk tûrin fuih rawh.

Lord Byron-a kha a kê a ṭha lo a, Robert Louis Stevenson leh John Keats-a te kha T.B. natna avângin taksa lamah harsatna lian tak an nei a. Charles Steinmetz leh Alexander Pope te kha natna avângin an zâng a kul a. Admiral Nelson-a khan mit pakhat chiah a nei bawk. Charles Darwin khan hliam na tak a tuar a, kut-tual lei-chhamin a awm a. Julius Caesar-a kha phûngzâwl nei a ni bawk. Thomas Edison leh Ludwig Beethoven-a te kha bengngawng an ni a. Peter Stuyvesant-a kha a kê a bul a, thinga siam ke a nei a ni.

Heng mite harsatna hi ngaihtuah ila. An nunah leh taksa-ah hringnun khawvêl an hmanna tibahlah theitu an nei a, tihlawhchham theitu an nei a ni. He intihsîakna khawvêlah hian ṭang thei lo leh tel ve thei lo tûr an ni hial awm e.

Amaherawhchu pianphunga an rualbanlohna chuan hlawhchhamna a pe lo a. Chakna thahrui tam zâwk leh thiltihtheihna nasa zâwk an neih phah a, vawiina an tawn leh an nihna chu hetiang hi a lo ni ta a ni.

Fanghmir te hi han ngaihtuah teh u, i kutzungchal vawi khat pen-a pêr vek thei an ni. Rim takin hna an thawk a. An châwl ngai lo, an ṭangrual a, an inzui dam dam ṭhin. An kalkawngah khan engemaw lo dah sak la, an kawng tihpin sak teh, an beidawng hauh lo ang, a helna kawng an zawng ang a, an kal zêl ang, an lêt ngai lo ang.

Kan thlen chin aṭangin hma i sâwn ang u. Mi tam tak chu an peih lo a, an hawikîr a, an hnungtawlh ṭhin. Keini erawh chu hma sâwn zêl tûr leh kan awm ang anga min pawmtu Pathian hnên kan thlen hma chuan theihtawp chhuahin ke i pen ang u.

FILIPI 3:16
Eng pawh ni se, kan thlen chin aṭang khân hma i sâwn zêl ang u.