PATHIAN HRIATPUITU

PATHIAN HRIATPUITU 1

ISAIA 43:10
Ka thuhretu i ni, Lalpa thuchhuak chuan a ti. Ka chhiahhlawh, ka thlan i ni, Min hre tûr leh min ring tûrin, Kei hi Pathian awm chhun ka ni tih hretu atân. Ka awm hmaa awm Pathian an awm lo va, Ka hnuah lah an awm hek lo vang.

Bristol khua, England ramah zan khat chu Damdawi ina hnathawkho chuan cocktail party an nei a. Cocktail Party chu zu chi hrang hrang inhona hunpui a ni ber ang chu. An zîngah chuan Hindu Brahmin dâktawr pakhat, Namboodripad-a a tel ve a. A sakhaw thurin a hre êm êm a. A sakhua-ah chuan a rinawm hle bawk.

Chu party-naah chuan zu hrang hrang an in a, dawhkan zau takah an ṭhu tlar dul mai a. Mahni bula mi ṭheuh kâwmin an hlim tlâng hle a. Chutih lai chuan nu pakhat, a hma dawhkana thei tui chiah inchhawp, zu telna in duh lo a hmu fuh a, Dr. Namboodripada chuan zu a in ve loh chhan a zawh chuan chu nu chuan Kristian a nih vanga in lo anih thuin a chhâng a. Mahse dâktawr chuan, “Kristiante pawhin an in tho alawm hei,” a ti a. Chu nu chuan, “Ni e, a nuna Isua Krista nei Kristian chu a nun a thianghlim a, hêngah hian a intibawlhhlawh lo a ni,” a ti a. A hnu-ah chu nu chuan Bible a present nghe nghe a ni.

Kum tam tak liam hnu-ah Dr. Namboodripad-a chu an ram, Kerela-ah a kîr a, Gideon Bible a chhiar aṭangin Pathianin a nunah thu a sawi a. Isua Krista chu chhandamtu-ah a pawm a, kristian a ni ve ta a. Brahmin hnam, Kristiana inlet chu a chhûngten an tuithlâr a, a nupuiin a ṭhen a, mahse rinawm takin a awm a, Ludhiana-a Christian Medical College Principal a rawn ni ta hial mai a ni.

Hun te a liam zêl a, a nupui pawh Kristian a rawn ni ve ta hial a, tichuan an chhungkua chuan Kristian chhungkaw ṭha tak, Pathian rawngbâwltu rinawm anni ta a ni.

Ringtu rinawm, phatsan ngai lo leh fel taka awm ṭhin chu Lalpan a chawimawi a, an nun aṭangin nasa takin Pathianin a ropuina a puangchhuak ṭhin a ni.

avatar
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
F. Lalrinawma Recent comment authors
  Subscribe  
newest oldest most voted
Notify of
F. Lalrinawma
Guest
F. Lalrinawma

Pathian Thu in rawn tarlan ṭhin hi a va ṭha teh lul em. Keimahin ka hlawkpui bakah midang te pawh ka hrilh chhawng fo ṭhin

Copyright © 2017-2019 Our Daily Bread Mizo.
Privacy Policy