THLAMUANG TAKIN AWM RAWH U

THLAMUANG TAKIN AWM RAWH U

— Rev. H. Ramthianghlima
AICS, Shekina Hill.

Ni thar chibai.

MATTHAIA 14:26-27
Tin, zirtîrte chuan amah chu dîl chunga kea a kal an han hmuh chuan, “Hmuithla a nih saw!” tiin an thlaphâng a, hlauvin an au ta vak mai a. Nimahsela, Isuan anmahni a be ta nghâl a, “Thlamuang takin awm rawh u; keimah ka ni alâwm; hlau suh u,” a ti a.

Hun rei tawh tak lo inzui tawh zirtîrte khan tinge Isua kha an hai theih tlat! Thlipui kârah ṭihbaiawm takin hmuithlâ angin a rawn inlâr tlat a lawm. Isua a ni tih hre mai nghal heklo le, mangang thlabârin an awm hman a nih kha. Tlânchhiatna dang awm si lo chu a manganthlâk ve viau mai thei. Mahse, chu hmuithlâ anga an hmuh chu a lo kal hnâi zêl a, “Keimah ka ni a lawm,” ti a, an awka hriat ṭhin ngei maia a rawn insawifiah hnu khân thlamuang takin an awm thei chauh a nih kha.

Isua hmêl hmuh kan tum dân leh kan hnêna a rawn inlâr dân hi a châng chuan a inanglo ṭhin khawp mai. Duhawm tak, ngainatawm tak, thlamuan awm tak anga a rawn inlan hun awm ṭhin mah se, a châng chuan ṭihbaiawm tak, chhiatna hrang hrang kan la hmuh leh tawn ngai loh hmangten a rawn inlâr ve fo ṭhin. Hetiang anga a rawn inlâr châng hian ‘Kei ka ni a lawm’ ti mai ṭhin ta lo chu kan hlau va, kan khûr a, mangang thlabârin kan awm ṭhin a nih hi. Min tihṭhaih a tum hrim hrim emaw tih mai tûrten rei tak tak mangang thlabârin min siam ṭhin a. Mahse, kei ka ni a lawm a tih hnuah erawh ṭihbaiawm taka rawn inlan a, kan lo hlauh êm êm te kha Lalpa hmêl a ni tih kan hre leh chauh ṭhin. Lalpa hmêl a ni tih kan hriat hnuah chuan ‘a ni maw Lalpa’ kan ti a. A hmêl hmutute chu lâwmin an khat ṭhin tih nun kan chang leh ṭhin.

Petera kha Isuan kal rawh a tih a, amah en chunga an kal kha chuan tui chungah khân a kal thei mai a. Mahse, sîr lam an hawi khân thlipui nasa tak a hmu a, hlauvin a thlabâr a, tuipuiah a pil mai dâwn a nih kha. He khawvêl tuipui zin kawng kan zawh mêk naah hian Isua krista en loh hi chuan hlauh tûr hi a va’n tam em. Chutiang kârah chuan Isuan amah rinchhanin kal rawh min ti a, tuipuia kan pil bo mai hlauvin min vêng reng si a.

Hripui kârah hian Lalpa hmêl duhawm tak a lo lang zêl dâwn a ni. Hmuithlâ angin kan hnênah a rawn inlâr rih pawh a ni thei e. Mahse, Lalpa hmêl a lo lan hunah chuan, a lo ni maw Lalpa kan la ti ngei ang. Hripui leh harsatna tam tak kârah hian Lalpan amah chauh en a hmalam pana kal zêl tûrin min ti a. Lalpa chuan kan kawng a ên ang a, min hruai zêl dâwn si a.

Nilên nuam le.

3 Comments

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.