TUMKAU NI

— Chhantea (Oriela patea)
East Lungdar

Khai le, naktûk hi Lal Isuan hring chan taksa a put laiin Jerusalem-ah Lal anga a luh champhaphâk a ni ta. Kristiante hunpui pawimawh tak kan Bible pawhin a ngaih pawimawh Chanchin Ṭha bu 4 ten an ziah vek a ni. He tumkâu ni lo thlen hian ka rilru a thil lo awm ve te chu:

1. Isua kha engati nge Lal ang chauha Jerusalem-ah khân a luh? Lal a ni lovem ni?
Ni e, lal a ni a lawm. Amah ngei pawhin lal anih thu leh a lal ram chu he lei ami a nih loh thu a sawi. A mite a thisena a tlanten lal nihna angin kan dawngsawng lo a. Lal dang neia awm anih avângin lal ang chauhin a ni a lo luh ni Jerusalem-ah khân. Tunah hian nang leh kei hi “Isua hi tu nge a nih?” tiin min zâwt se awlsam takin lal leh Pathian tiin kan chhâng ang. Mahse, lal a nihna ang hian kan nunah, kan ni tin khawsaknaah, kan eizawnnaah hian lal atân kan pâwm em tih hi lo inzâwt chiang ang u. Kan bialnu/bialpa lakah te, kan tisa nawmna tûr atân te hian Isua hi lalah kan dah phal tak meuh em le?

2. Sabengtung:- Mithiamte chuan sabengtung hi ran zawng zawnga ran â ber, mâwl tak a ni an ti. Mihringte pawn puakphurah kan hmang a, inchhûng min rahpui tûr pawhin kan duh lo a ni. Kha kher kha Lal Isuan a lo thlang kha mak ka ti êm êm a ni. Eng nge a chhan ni ang le?

Sabengtung kha ran â tak, mihringte thuam phur mai mai kha a chunga chuang Isua kha a ropui êm avângin a lo ropui a, mihringte ngeiin a kalna atân chhâwl te, puan te an lo phah anih kha. Ni e, keini pawh hi engmah ni lo mah ila, kan bul vêla miten eng teh hûah min ngai lovin, hausakna, ropuina, thiamna leh finna te nei lo mah ila, kan chungah Isua a chuan chhûng chuan kan mâwi a, kan hlû a, kan ropui a ni. Pathian ngaihah pawh hlu tak kan ni. Chutihrualin Isua chuanna tlâk ni tûr chuan sabengtung anga tlâwm, pu te thuawih, krista hruaina apianga kal kan nih a ngai thung a ni.

3. Mipuite:- Isua thilmak tih tam tak hmu tawh, a pian leh mûrna thlenga hretu tam tak te khân lal ang mai a lo cheibâwlin an lo dawngsawng a. Isua hunlaia mipui rethei ve tak tak kut hnathawka ei zawngte khân an puan te a kalna atân an lo phahsak a. Puan êm nei lo pawhin hnah chhâwl te an lo phahsak a. Isua tân an tih theihtâwk an ti a. An la au rual zui bawk.

Khai le, tûnah hian midangte angin i tih theih tâwk a sâng lua lo pawh a ni thei. Kohhrana Pathian rawngbâwlna chanvo-ah pawh chanvo hlu tak i chang lo a ni thei. Pawi ti suh, Isuan a beiseina che chu atân i tih theihtâwk apianga theihtâwp i chhuah kha a ni e.

Isu ropui tak in leng rawh.
I lal zia lantîr ang che.

MARKA 11:9-10
Tin, a hma lama kalte leh a hnung lama rawn zuite chuan, “Hosanna! Lalpa hminga lo kal chu fakin awm rawh se, Ram lo thleng tûr, kan pa Davida ram chu chawimawiin awm rawh se. Chungnung berah khian Hosanna!” tiin an au va.

Lalpa’n a thu malsâwm rawh se.