MITTHI ZING ATA A THO LEH TA

MITTHI ZING ATA A THO LEH TA

— Rev. K. Lianmunga

Thupui: Mitthi zîng ata a tho leh ta!
Chhiar tûr: Matthaia 28:1-7

Lal Isua thihna hneha a thawhleh thu hi kristiante thurin vawr tâwp leh innghahna lungphûm a ni a. Ziaktu pakhat chuan “Kristiante chhinchhiahna hi Kraws ni lovin Thlân Ruak lem ni awm zâwk tak a ni,” a ti a. Chumi awmzia chu Krista thawhlehna avânga thlan lo ruak ta pawimawhzia a sawina a ni. Tirhkoh Paula chuan Krista thawhlehna tel lo chuan kan thurin te, kan thuhril te hi engmah lo a nih thu sawiin “Krista kha kaihthawhin a awm loh chuan kan thuhril hi engmah lo a ni ang a, in rin pawh engmah lo a ni bawk ang (I Kor. 15:14)” a ti a. Kohhran a lo din tirha Krista thuhretu inti te pawhin an hriatpui ber chu Krista thawhlehna thu a ni.

Lal Isua khawvêla a lo pian thu hi khawvêl hian a dodâl lova, a ringhlel bawk hek lo, kraws-a thih thu pawh khawvêlin a ringhlel lo. Amaherawhchu, thihna hneha mitthi zîng ata a thawhleh thu hi khawvêl hian a dovin a hnial kalh reng a ni. Penticost ni-a Thlarau Thianghlim a lo thlen a, zirtîrten Chanchin Ṭha an puan hmasak ber chu Isua Krista, in khenbeh kha thihna chelhhlen rual lovin a tho leh ta, chu chu a hretute kan ni e tih hi a ni.

Lal Isua thawhleh thu hi khawvêl chanchina thil awm ngai lo leh awm leh thei ngai tawh lo tur kha, Isua thlân a ruak miau si a. Hmeichhe ṭhenkhat Mari Magdalini leh Mari dangte khan Isua t²na duhsakna leh hmangaihna lantîr nan rimtui chulh tûra thlân an va pan kha Vantirhkohvin “A tho leh ta, hetah a awm tawh lo” ti thu a lo hrilh ta mai. Isuan thlân vêngtu sipaite leh puithiam lal leh upate an buai kher mai. Thlân vêngtu chu tangkain an tham a, an muthilh hlanin Isua chu zirtîrten an ru bo tia sawi tûrin an hrilh ta ringawt mai a ni. Lal Isua hi a tho leh emaw, ru bo emaw pawh nise sipai ventîr reng chunga thlân lo ruak kha a mualphothlâk hrim hrim a ni. Pathian thil tum leh a hnathawh do nân chuan sipai chakna te, puithiam lal leh upate finna leh sum leh pai zawng zawng pawh a chak tâwk lo fai vek a ni. Pathian thiltihtheihna leh thawhlehna thiltihtheihna chuan chung chu a hneh fai vek a, ropui takin mitthi zîng ata Lal Isua kha a tho leh a ni.

He Lal Isua thawhlehna hian:-
Thihna aiin Nunna a chak zâwk tih min hrilh a
Sual thiltihtheihna chu he thawhlehna avang hian hnehin a awm tih min hrilh a
Inhuatna aiin Hmangaihna a chak zâwk tih min zirtîr bawk.

Krista thawhlehna chuan he khawvêl piah lamah beisei tûr min siamsak a. Manganna leh lungngaihna, thihna awm tawh lohna ramhlun zâwk min kawmhmuhin min thlîr tîr a, he hringnun ral leh mai tur piah lama Nun Tak min buatsaihsak avangin thihna te hlau tawp lo tura kan nunna thuhruk a lo ni ta. Lalpa chu fakin awm rawh se.

Krista thawhlehna chu chatuan atân a ni a, a thi leh tawh dâwn lo tih kan hriat avângin, ringlote boralna leh thihna hunah pawh, he thawhlehna nun ṭawmpuitute chuan nun bul kan ṭan dâwn chauh mai hi Krista thawhlehna avânga kan chan a lo ni, a va ropui êm!! Vawiinah hian thihna chelhhlen rual lova tholeh Krista chu kan nunah a inlâr em le? Vawiinah hian sual thihna thima inhmang zawng zawng te u, i tho ang u hmiang, Isuan sualna chu min hnehsak ta, kan thawhlehna ah i puang ve ang u.

Tuna sual phuara awm mêk te kan awm em? i tho ang khai, kan hnehna tûrin Chhandamtu Isua a tho leh asin. Kan chak loh êm avâng leh kan rinawm loh ṭhin êm avang hian rinchhan tûr kan mamawh ṭhin. Mi chak lo leh mi bawrhsâwmte tân Chhandamtu Isua a tho leh ta. Kan thlarau nuna kan saltânna te, Pathian kan hnaih ṭhin lohna te, a ropuina dâl theitu sual leh a hnathawh zawng zawng te i thawh chhuahsan ang u khai. Thawhlehna Ramah, Nun Tharah i chuang chhuak ang u, a hlui ral sela, Lal Isua tholeh nun thiltihtheihna ngei chu kan nun ṭheuhah nun thar lo thleng mawlh rawh se.

Lalpan a thu malsawm rawh se. Amen.

3 Comments

  1. Nunkawng Chaw hi a tha hlawm khawp mai,a hlawkthlak bawk.

    Nunkawng Chaw hi a thain,a hlawkthlak thin e.

  2. A men
    thuhriltu tamzawkten an hril phakloh i rawn chhawp chu a ropui hle mai han tang zel teh Lalpan malsawm che rawhse

  3. A va thain a va ropui teh lul em!!!!!!!

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.