PATHIAN THU: NUN HRUAITU

— Chhantea (Oriela Patea)
E. Lungdar

THUFINGTE 6:23
Thupêk chu khâwnvâr a ni a, dân chu êng a ni si a; Tin, zirtîrnain a zilhhauna chu nunna kawng a ni.

Mizo Study Bible-ah chuan ti hian a ziak, “An hruaina chuan nun dân ṭha chu a kawhhmuh ang che,” tiin.

Ni e… Pathian thu hi kan nun hruaitu atâna kan hman apiangin kan nun dân tûr leh awm dân tûr engkim hi Pathian duhzawng a nih chuan nun dân ṭhain kan nung tihna a ni.

Mi thil hre zâwk ten an sawi ṭhin Billy Graham-a nupui, Ruth Graham khan an fate enkawlna atân khawmualpui tin ami finna lehkhabute a lakhâwm a. Mahse, chung ai chuan Pathian thu Thufingte hmanga enkawl hi a ṭha zâwk a ti e an ti.

Pathian thu hi kan nun hruaitu atân a aia ṭha a awm lo a, engkim kan nun atâna mamawh hi a kim a ni.

Pathian thupêk chu kan tân khâwnvâr a ni a. Thim zînga êng kan chhit chuan thil kan hmufiah ang hian Pathian thupêk chuan thil sual a nihna tak hriatfiahna min siamsak a ni. Pathian thupêk kan zawm chuan kan nun khâwnvâr hi a mit ngai lo ang a, chu chu kan nun hruaitu atâna kan hman phawt chuan nun dan ṭha min kawhhmuh zêl ang.

Dân chu kan tân êng a ni si a, thupêk leh zirtîrna chu thil a nihna tak hriat fiahna a ni a, heta ‘Dân’ a tih hi zirtîrna tihna tluk a ni. Chu zirtîrna kawng kawhhmuhtu leh kaihhruaitu êng (dân) zawm chu kan nun hruaitu a ni. Kohhran inkaihhruaina dân pawisak te, vantlâng leh sawrkâr dân pawisak te hi ringtuten Pathian thu avânga kan tih tur a ni.

Zilhhauna chu kan tân nunna a ni. Thu zirtîr zawm chu nunna anih thu te, dam reina anih thu te kan sawi tawh a. Heta kan sawi tûr thununna chuan sual a sim tîr a, chu chuan nun a siamṭha a, dam reina a thlen ṭhin.

Pathian thu hi lei a kan damlai ngei a kan hman a, kan nun hruaitu atân kan hman tlat chuan malsâwmna pawh min tiam a ni.

Pathianin a thu malsâwm rawh se.