AW ROPUI BER

Sam 8:1
“Aw LALPA, kan Lalpa, Lei chung zawng zawngah hian, i hming chu a va tha em! I ropuina chu van chungahte khian i dah a.”

AW ROPUI BER tih hla, Kristian hla bu No.18-a mi hi kum 152 liam taa phuah tawh kha a ni a. Kum 2001 khan Today’s Christian Magazine chuan survey a nei a. ‘Amazing Grace’ tih loah chuan Pathian chawimawina hla tha ber leh mi sak tam leh duh berah a thlang hial.
.
He hla phuahtu hi Carl Gustav Boberg-a a ni a. August ni 16 1859 khan Monsteras, Kalmar County, Smaland-ah a lo piang a. Thing mistiri fapa a ni.
.
Carl Boberg-a leh a thiante chu Kronoback-ah chawhnu inkhawm an hman zawh hnuin Monsteras lam panin an haw a. Khua a nuamin boruak a tha hle a. Mahse thawklehkhatah khawpui a rawn ri dum dum mai a, chhum a lo lang nghal a, tek eng tak chu a rawn de zuai zuai a. Thlipui na tak rawn thawin a zui nghal a. Khawpui ri leh tek tlate chu an rapthlakin an tihbaiawm hle a. Thli na tak chuan phai buh leh hnim te chu a len tlu dual dual a. Chu veleh ruah hmi a rawn tla siar siar a, chhum leh khawpui ri a lo reh a, tek pawh a reh a. Ruah hmi pawh chu rei lo te hnuah a reh leh thuai a. Chuveleh boruak a rawn thiang kuk mai a, Chhimbal a rawn zam kual ruih ta mai a.
.
Carl Boberg-an In a thlen chuan a tukverh a hawng a. Monsteras tlang leh mual chu a han thlir let a, thingkung zar thle dual dual leh an thawm te, vate hram siap siap ri te chuan a lung a tileng em em a. Chu tlaini nem tak kara lenkawl eng no damdiai a thlir reng lai chuan Biak In dar a rawn ri ral ral mai a. Chu a thil hmuh leh benga a hriat te leh a haw kawnga a thil tawn avang chuan he hla hi phuah a lo ni ta a ni, tiin a sawi.
.
A vah pa, Bud Boberg-a sawi dan chuan he hla hi Sam 8-a innghat tlat niin a sawi.

Chutin fak che thlain a nuam Lalpa,
Aw ropui ber, Aw ropui ber.