VAN SIPAI

ISAIA 53:5
‘Mahse, ani chuan kan bawhchhiatna avângin hliam a tuar a, Kan sual avânga sawisak a ni; Muanna kan neih theih nân hrem a tuar a, A vuak tuar chu kan tân damna tûr a lo ni.’

Khuahkhirhna leh tihduhdahna hnuaia awm chu hrehawm tak a ni. Tumahin chutianga hringnun hman chu an duh lo ang.

Kum zabi 17 lai khan Europe mite chuan America-ah awm hmun an khuar a. Chutih lai chuan hnathawktu tur hi America ramah an duh em em a. Sal turin an inhralh a, bâwih an inlei hial ṭhin a ni. A tîrah chuan West Indies mite chu bâwih atân an hmang hmasa ber niin an sawi a. Kum zabi 18 a lo thlen chuan Africa mi, mihangte chu Sal-ah an hmang a, Philadelphia-ah te, Richmond khawpui-ah te, Charleston leh New Orleans-ah te chuan Sal hralhna leh zawrhna Bazar hmunpui a awm hial a ni.

Sal tânna, kut kawl, chain leh hmanraw dangte an hmang nasa em em a, nupa an inṭhen a ngai a, naupang duhawm tak tak te chuan enkawltu an nei lo a, a ṭhen phei chu kum tling loin an chhawr ṭhin.

Abraham Lincoln-a a rawn President a, bâwih awm tawh lo turin hma rawn lain tualchhung indona a chhuak hial a. Chakna a chang ta a, bâwihte chu tih zalen an ni ta a. Bâwihte tân chuan chu tluka lawmna nasa leh chhandamna ropui a awm thei lo ang.

Chung aia hrehawm leh rapthlâk hnuaiah mihringte hi kan awm a. Mahse Pathian chuan a fapa Isua Krista hmangin min chhanchhuak a, a fa-ah min vuah leh a, Diabola fa niloin Pathian fate kan lo ni leh ta a ni.

Kan tana kraws-a a tuarna te, min hmangaih avanga kan aia a thihna te, sual bâwih ata min chhanchhuak tura kraws-a khenbeh a nihna te kha thinlungin thlîr ila, Pathian min hmangaihna ropui tak avangin amah chu i fak ang u.

Chutichuan, Fapain a zalêntîr che u chuan in zalên tak tak tawh ang. – JOHANA 8:36