PATHIAN ROPUIZIA

SAM 8:3-4
I kutchhuak vânte khi ka han thlîr a, Thla leh arsi i dahte khi, Mihring hi eng nge maw a niha, i hriat renga, Mihring fapa pawh engtiziaa rawn kan ṭhîn nge i nih le?

Pathian ropuizia kan hria, mahse hriatphâk rual loha ropui a ni si. A ropuina leh thiltihtheihna kan hriat chhunte hian kan nun a tidanglam lo fo ṭhin a, sawi nawn a ngai ṭhin a ni.

Pathian hla satu pawl lâr tak, Petra-a an zaitupa ber, John Schlitt hla phuah, ‘God is too big’ tih-a a thunawnah chuan, ‘Engmah hian Pathian ropuizia min ti hrechhuak zo lo ve, a thil tum leh thil rel dan te hi, a chhan chu Pathian chu a ropui em a ni’ a ti.

Khuai te nun dan hi a mak danglam ve hle a. Anmahni khawpui an din a, an bu-ah chuan pindan chi hrang hrang 109000 chuang an siam thei a. Inthlahchhawnna pindan 12,000 an siam bawk a, an Lalnu ber awmna tur hmun thianghlim leh chungnung an siam bawk.

Khuai-te chuan boruak awm dân a zirin an bu chu an venghim ṭhin a. Khua a lum chuan an khawizu chu a tuiral mai ang tih an hlauh avangin a tidaitu pâwl (Squad) an siam a, chûngte chuan an bu awngah chuan awmin an thla an zap char char ṭhin a, an colony chu boruak nuam takin an siam ṭhin a ni.

Pâwl dang an awm leh a, chungte chuan an bu aṭanga Km 10 chhûnga pangpâr zû la turin an thawkchhuak reng bawk a ni.

Chutiang chuan awmze nei leh rim takin hna an thawk a. Pathian siam dan an ni. Keini mihringten an khawizu siam chu damdawi-ah te kan lo hmang leh ṭhin a nih hi.

Khuai tereuhte thluakin chutiang chu a tih theih chuan Pathianin kan chunga a rorel dan leh thil tum avangin tu in nge zawhna pe thei le? Van kan thlir a, vuantu leh chelhtu awm lovin Arsi an awm ringawtte hi a va makin a va ropui em. Pathian thilsiam dan a ni e. Amah chu i fak ang u.

SAM 150:6 – Engkim, thaw thei tawh phawt chuan Lalpa chu fak rawh se. Lalpa chu fak rawh u.