INHER REM ZEL

2 KORINTH 4:15
Hêng zawng zawng hi in ṭhatna tûr a ni a; tichuan, mi tam tak zîngah Pathian khawngaihna a pung ang a, Pathian ropuina tûrin lâwmthu sawina pawh nasa takin a pung ang.

Khawvel hi a danglam chak hle. A chhunga cheng mihring mamawh leh duhzawng te, hmasawnna tam tak avang tein nitinin a danglam a ni. Dinhmun a danglam a, khawsak a danglam ang bawkin sakhuana kawnga kan inrelbawlna pawh a danglam zel a ni.

Holland rama Windmill (Thli chakna hmanga thil herna khawl) pahnih chanchin an sawi hian awmze tam tak a nei a. Chu rama windmill pahnihte chu tlang mawi takah an ding dun a, thli thaw dawngin hmuhnawm takin an vir a, hna an thawk ṭhin bawk a ni.

Tichuan, Electricity an rawn hmuchhuak ta a, pakhat zawk chu electric hmangin an vir tir a. Khawl thar an vuah a, man tlawm zawk leh chak zawk bawk siin hna an thawh tir ta a. Pakhat zawk chu an siam ve lo a, tunhma-a a awmdan angin a awm reng a, thli a thawt chang chauhin a vir a, hna a thawk a, electric hmang zawk aiin a thawk chhe ta hle a ni.

Khawvel hmasawnna hmanga siam mil zel windmill chu ṭangkai takin an hmang chho zel a. Chutihlai erawh chuan pakhat zawk erawh thil hlui-ah a chang zo ta a, a hnathawh ṭhat loh avangin an hluihlawn a. Chu tlang mawi taka a lo ding ve mai mai chu khualzinmite hmuh atana mawi chauha ṭangkai a ni ta a ni.

Aw le, eng pâwl pawh, Kohhran pawh tiamin, a nihna tibo chuang lova tunlai khawvel mila inher rem thiam lo chu miten an hlut lo a, an tuipui hek lo a, khualzinmite hmuh leh hriat leh zirchian atan chauha ṭangkai an ni mai ṭhin.

1 KORINTH 10:31 – Chutichuan in ei emaw, in in emaw, thil in ti emaw, in tih apiangah Pathian ropuina tûr hlîrin ti rawh u.