REMRUATNA ROPUI

EFESI 1:11-12
Ama remruat ang taka thil engkim tihlawhtlingtu duh dân ang ngeiin Krista zârah a mite ni tûrin keini hi min ruat lâwk a, min thlang chhuak tawh a ni. Keini Kristaa beiseina nghat hmasate hi a ropuina tilangtu tûr kan ni.

Pathian remruatna hnuaia leng kan ni a, kan tana ṭha turin rem a ruat ṭhin kan ti a, harsatna leh lungngaih mangan kan tawhte hian ani chuan thil tum a nei a, a ropuina turin kan chungah a thlen tir kan ti ṭhin a ni.

Jane Nideth-i chanchin ah hian zir tur kan nei niin a lang. Nu lian tak leh thau tak a ni a, Kg 120 vel laia rit a ni. A thau êm avangin hriselna lamah harsatna tawh chang a nei fo ṭhin. In tih chêr tumin ṭan a la ta a, thla 2 chhûng vel chu a tâwk chiahin chaw a ei a, awmze nei takin exer a la ṭhin a. Chutianga a tih avang chuan Kg 50 laiin a tla thla ta mai a ni.

A lawm em avang chuan a ṭhianṭhate a sawm a, an inah chuan tlai tin ei leh in neih mumal chungchang te, exer lak mumal ṭhatzia leh hriselna atana a pawimawhzia an sawi ṭhin a. Chutaṭang chuan anmahni pawhin an zawm nghal zel bawk a.

Miten an lo hre zel a, pâwl lian tak an lo din ta reng mai a. Vawiinah chuan hriselna kawnga harsatna nei te, thau lutukte leh rit lutukte tana malsawmna an lo ni thei ta hial a. Khawvel ram hrang hrang 24 aṭangin kartin-a meeting an neih ṭhin chu miten TV aṭangin an lo thlir a, a hmunah mi tam tak an kal ṭhin bawk a ni.

Jane Nideth-i leh a hote chuan kawng engkimah inenkawl a pawimawh tih hriain naupang aṭanga puitling thlengin inenkawl ṭhatzia chungchang an zirtir ṭhin a ni.

Pi Jane-i nun aṭangin eng nge kan zir theih le? A hmaa kan sawi ang khan kan chunga harsatna te hi Pathianin tuar chhuak thei turin min ṭanpui a, chu kan chunga a remruat chu a rawng kan bawl theihna tur atana min tah hriamna hmanrua a ni.

Thlarau puihna hmuh fiah thiamte chuan Pi Jane-i angin midangte harsatna hrethiam chungin Pathian rawngbawlna pawimawh takah kan hmang thei a ni.