RINNA DANGLAM LO

1 TIMOTHEA 6:10
Tangka sum ngainat hi sual tinrêng bul a ni, sum ngah an tumna lamah ṭhenkhat chuan rinna hi an pênsan a, lungngaih sawi sên lohvin mahni an intina ta a ni.

Australia rama Queensland University-a êng lam zirmi, Chemist chuan acid chi hrang hrang tam tak te, thil inhlawm khawm chi hrang hrang te leh leilung siamna bawlhlo eng eng emaw te chu Laboratory room-ah a chawhpawlh a, an han chhuang sa ta a, hlawhtlinna ropui tak hmuin a thil tum Tube hmangin êng a siam ta a ni. A thil siam dan report kimchang a ziak a, London khawpuia Scientific Journal-ah chuan an tichhuak ta chuai chuai mai a ni.

British Chemist-in a lo hmuh chuan chu thil siam dan chu an han ti ve chhin a, ram hla taka awm daih ni mah se Queensland University zirlaiin-a a thil hmuhchhuah ang chiah chu a hmuchhuak ve ta tho a. Chu chuan chu thil chu thudik a nihzia a tilang chiang lehzual a ni.

Kum tam tak ral hnu-ah pawh chu a thil hmuh chhuah chu a dik leh dik loh an han tihchhin pawh chuan a dikzia an hmuchhuak leh tho thin a, ram hrang hrangah pawh tichhin mah se hmun leh hunin a dik lohna a haichhuak thei chuang lo a ni.

Thudik chu thudik a nih chuan engmahin a tidanglam thei lo a, engmahin a hneh thei bawk hek lo.

Mi ṭhenkhat chuan, “Thudik chu a awm sa a, dik lohna hi a ni haichhuah ngai zawk chu” an ti. Chesterton-a ve thung chuan, “Tunlai khawvela thil sual ber chu dik lohna a ni lo a, thudik chanve tih nawn tih nawn luihna hi a ni” a ti.

Aw le, kan sawi tum chu RINNA hi a ni. Rinna chu rinna tak tak a nih chuan a danglam tur a ni lo. Tunlai kristiante hi rinna kawngah kan inenfiah a ngai hle. ‘Ka ring’ kan tih lai hian kan rinna tak tak erawh kan awmna hmun a zirin a danglam fo ṭhin a. Khawi hmunah pawh, eng hunah pawh nghet takin chu rinna-ah chuan kan awm tur a ni. Mahni inenfiah fo ang u.