CHHANHIMTU PATHIAN

2 PETERA 2:9
Lalpa chuan amah ṭihtute chu tuarna laka chhan chhuah dân leh rorêl Ni a lo thlen hma pawha mi sual hrem dân a hria.

Sam 50:15-ah chuan Pathianin amah kotute a ṭanpui duhzia kan hmuh kha, “Mangan ni-ah min ko ula, Ka chhanhim ngei ang che u, Tichuan, min chawimawi ang.” tiin.

Kan manganni-ah te, kan lungngaihni-ah te, kan ṭahni-ah te hian Pathian kan au ṭhin nge a lakah lungngawi lovin kan vui mai ṭhin zâwk le! He chanchin kan sawi leh tur hian kan nun tiharh se a va lawmawm dawn em.

Russian Emperor, Nicholas I chuan an ram phatsantu ni-a a hriat mi tam tak chu a man a. An zingah chuan mi pakhat, sualna leh dik lohna nei miah lo a tel ve a. An mi man dangte nen chuan tân inah an khungkhawm vek a.

Dik lo leh fello taka thiamloh an chantîr avangin chupa chu a thin a rim êm êm a, Pathian rawngbâwltu a nihna te, Kristian a nihna te chuan awmzia awmin a hre lo a, tlaikhat phei chu a Bible ken luh chu bang deng dawpin a paih ṭhuai mai a ni.

Ni khat chu tân ina rawngbâwl ṭhin hian a rawn tlawh a, chupa nen chuan an inkawm a, Matthaia 11:28 thu kha a chhiar sak hnu chuan a haw san a. Ni a lo rei zêl a, a lungngai êm êm reng a, a tisa leh thlarau pawh a chau êm êm a, a Bible chu a chhar leh ta a. Sam 50:15-na chu a keu fuh a, a chhiar zawh chuan a han keu leh thawk a, Pathianin Sakeibaknei pûk aṭanga Daniela a chhanchhuahna thu kha a chhiar fu leh ta a. Pathian thlarauin a awmpui a, ngaihdam dilin a ṭawngṭai a, thlamuang takin a awm thei ta a ni.

Ni thum ni chuan tânin kawngkhar chu a rawn inhawng a, sipai chuan, “Tlangval, King Nicholas-an thiamlohna leh dik lohna i chungah a hmuh loh avangin chhuah i ni e” a rawn ti ta mai a. Chumai ni lovin an ram rorêlna-ah dinhmun pawimawh tak pêk anih tur thu a hrilh bawk a. Thinlung leh tihtakzeta Pathian au tu chu chhanhimin a awm ta a ni.

MATHAIA 11:28 – Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u.